Fréttir

Landstólpinn, Samfélagsviðurkenning Byggðastofnunar er viðurkenning sem Byggðastofnun veitir árlega á ársfundi sínum. Viðurkenningin er hvatning, því hugmyndin að baki er að efla skapandi hugsun og bjartsýni.

Eirný Vals hefur verið ráðin „ Verkefnisstjóri Brothættra byggða – Skaftárhreppur til framtíðar“, hjá Samtökum sunnlenskra sveitarfélaga. Eirný mun hafa búsetu í Skaftárhrepp og hefja störf um næstu mánaðarmót.

Í gær var skrifað undir samninga um sóknaráætlanir landshluta fyrir tímabilið 2015-2019. Þar með var stórum áfanga náð í samskiptum ríkisins við landshlutasamtök sveitarfélaga og mikilvæg skref stigin í átt að einfaldara og gagnsærra kerfi.

Byggðarannsóknasjóður hefur þann tilgang að efla byggðarannsóknir og bæta þannig þekkingargrunn fyrir stefnumótun og aðgerðir í byggðamálum. Stjórn sjóðsins var skipuð í byrjun árs og auglýsir nú í fyrsta skipti eftir umsóknum um styrki.

Fimmtudaginn 5. febrúar tók fiskvinnsla Ísfisks formlega til starfa í frystihúsinu á Breiðdalsvík. Fiskvinnsluhúsið að Sólvöllum 23 í Breiðdalsvík hefur verið í eigu Byggðastofnunar frá árinu 2008 þegar vinnsla þar stöðvaðist. Fyrir rúmu ári síðan ákvað Byggðastofnun, í samvinnu við heimamenn í Breiðdalsvík, að ráðast í breytingar á húsinu til þess að það mætti nýtast betur undir margþætta atvinnustarfsemi.

Byggðastofnun, Búlandstindur og Fiskeldi Austfjarða hafa gert með sér samkomulag um aukna byggðafestu á Djúpavogi. Samkomulagið felur í sér samstarf um nýtingu á 400 þorskígildistonna aflaheimildum af aflamarki Byggðastofnunar auk mótframlags samstarfsaðila í eldis- og bolfiski. Samkomulagið er til 3 ára, með möguleika á framlengingu um 1 ár.

NORA óskar eftir verkefnahugmyndum og styrkumsóknum með umsóknarfrest þann 2. mars 2015. Norræna Atlantssamstarfið, NORA, styrkir samstarf á Norður-Atlantshafssvæðinu. Í því augnamiði veitir NORA verkefnastyrki tvisvar á ári til verkefna sem eru í samstarfi a.m.k. tveggja aðildarlanda, en löndin innan NORA eru Ísland, Grænland, Færeyjar og strandhéruð Noregs.

Hámarksstærð aðalverkefna er 2 milljónir evra og er styrkur er háður a.m.k. 40% mótframlagi umsóknaraðila en styrkur til fyrirtækja er háður 50% mótframlagi. Mikilvægt er að verkefnin skili af sér afurð, vöru og/eða þjónustu sem er til þess fallin að bæta atvinnulíf, búsetu og/eða auka öryggi íbúa á norðurslóðum.

Vegna fréttaflutnings um málefni Flateyrar og Þingeyrar og aflamark Byggðastofnar vill stofnunin taka fram að málið er í þeim farvegi sem lög um stjórn fiskveiða og reglugerð nr. 647/2014 kveða á um. Rétt er að árétta að Byggðastofnun „úthlutar“ ekki byggðakvóta, heldur auglýsir í opnu og gegnsæju ferli eftir samstarfsaðilum um eflingu viðkomandi byggðar og nýtingu þess aflamarks sem stofnunin hefur til ráðstöfunar í byggðarlaginu. Hafa ber í huga að þær aflaheimildir sem Byggðastofnun ræður yfir til þessara verkefna eru takmarkaðar og geta ekki einar og sér myndað grundvöll atvinnulífs á viðkomandi stöðum. Því skipta mótframlög og nýting þeirra til atvinnusköpunar höfuðmáli.

Eyrarrósin verður veitt í ellefta sinn í mars næstkomandi, fyrir framúrskarandi menningarverkefni á starfssvæði Byggðastofnunar. Markmið viðurkenningarinnar er að beina sjónum að og hvetja til menningarlegrar fjölbreytni, nýsköpunar og uppbyggingar á sviði menningar og lista. Umsækjendur um Eyrarrósina geta meðal annars verið stofnun, tímabundið verkefni, safn eða menningarhátíð og það eru Byggðastofnun, Flugfélag Íslands og Listahátíð í Reykjavík sem staðið hafa saman að verðlaununum frá upphafi árið 2005.