Fréttir

Stýrihópur Stjórnarráðsins um byggðamál sendi nýverið frá sér greinargerð um framvindu samninga og ráðstöfun fjármuna árið 2015. Í öllum landshlutum hefur verið unnið að sóknaráætlunum frá árinu 2013 og í byrjun árs 2015 undirrituðu ráðherra sjávarútvegs, landbúnaðar og byggðamála og ráðherra mennta- og menningarmála samninga við öll landshlutasamtök sveitarfélaga um sóknaráætlanir fyrir árin 2015-2019.

Framkvæmdasýsla ríkisins (FSR), f.h. Byggðastofnunar, hér eftir nefndur verkkaupi, auglýsir eftir hönnuðum til að taka þátt í hönnunarútboði vegna nýs skrifstofuhúsnæðis Byggðastofnunar á Sauðárkróki. Hér er um að ræða hönnunarútboð þar sem þátttakendur verða valdir með tilliti til hæfni, reynslu af hönnun mannvirkis og lóðar. Leitað er að hönnunarteymi sem getur tekið að sér að hanna skrifstofubygginguna, samkvæmt kröfu og þarfalýsingu sem er hluti af útboðsgögnum.

Í skýrslunni er gefin mynd af þróun atvinnutekna á landinu eftir atvinnugreinum, kyni, landshlutum og svæðum. Ljóst er af umfjölluninni að samtölur og meðaltöl slétta út mun á milli atvinnugreina og landsvæða og gefa óljósa mynd af þróun einstakra atvinnugreina á einstökum svæðum. Atvinnutekjur á árinu 2015 námu tæpum 980 milljörðum kr. og voru að raunvirði ríflega prósenti hærri en þær voru hrunárið 2008 á meðan íbúum fjölgaði um rúmlega 5%.

Stjórn Byggðastofnunar ákvað á fundi sínum þann 15. apríl sl. að styrkja fjóra meistaranema sem vinna að lokaverk­efnum á sviði byggðamála. Heildarupphæð styrkjanna er 1 milljón. Tvö verkefni fá styrk að upphæð 350.000 hvort og önnur tvö styrki að upphæð 150.000 hvort. Verkefnin eru fjölbreytt að snúa að ferðamálum, skipulagsmálum, raforkuframleiðslu og flutningi ríkisstofnana. Markmið Byggðastofnunar með stuðningi við rannsóknir á háskólastigi á sviði byggðamála er ekki síst að auka vitund um byggðamál og byggðaáætlun og að glæða áhuga háskólastúdenta á rannsóknum á málefnasviðinu.

Raforkunotkun heimila hefur hækkað í verði á milli ára en hitun hefur aftur á móti lækkað. Heildarorkukostnaður heimila hefur lækkað á flestum þeim stöðum sem skoðaðir eru á milli áranna 2015 - 2016.

Nú hefur verið opnað fyrir umsóknir fyrir Eyrarrósina 2017. Umsækjendur geta meðal annars verið stofnun, tímabundið verkefni, safn eða menningarhátíð utan höfuðborgarsvæðisins.

Bjartsýni og stórhugur einkenndi andrúmsloftið á íbúafundi í verkefninu „Breiðdælingar móta framtíðina“ sem haldinn var í grunnskólanum á Breiðdalsvík þriðjudagskvöldið 15. nóvember sl. Þangað mættu 25 íbúar ásamt verkefnisstjórninni.

Dagana 15.-16. nóvember sl. var verkefnastefnumót íslenskra þátttakenda í verkefnum innan Norðurslóðaáætlunarinnar haldið á Hótel Hamri í Borgarnesi. Meginmarkmið verkefnastefnumótsins var að efla tengslanet þátttakenda, kynna verkefnin sem nú eru í gangi með íslenskum þátttakendum, fara yfir helstu þætti er varðar fjárhagsuppgjör, skýrslugerð og endurskoðun verkefna og fara yfir þátttöku og fjárhagsstöðu Íslands í áætluninni.

Í dag er síðasti vinnudagur Elínar Gróu Karlsdóttur forstöðumanns fyrirtækjasviðs Byggðastofnunar. Elín Gróa var ráðinn til starfa sem sérfræðingur á fyrirtækjasvið Byggðastofnunar í desember 2007, og síðan sem forstöðumaður fyrirtækjasviðs í október 2012. Sem forstöðumaður fyrirtækjsviðs hefur hún haft umsjón með útlánastarfsemi Byggðastofnunar og innleitt þar breytingar á mörgum sviðum í takt við þarfir viðskiptavina stofnunarinnar og atvinnulífs landsbyggðanna. Þá hefur hún ekki síst beitt sér fyrir því að kynjasjónarmið vega nú æ þyngra í útlánum stofnunarinnar.

Á grundvelli reglugerðar nr. 643/2016 auglýsir Byggðastofnun eftir samstarfsaðilum um nýtingu viðbótaraflaheimilda á Þingeyri, Flateyri og Suðureyri í Ísafjarðarbæ, á Raufarhöfn í Norðurþingi og Breiðdalsvík í Breiðdalshreppi.