Fréttir

Færeyingurinn Ásmundur Guðjónsson tekur við stöðu framkvæmdastjóra Norræna Atlantssamstarfsins, NORA, þann 1. ágúst nk. Hinn nýi framkvæmdastjóri á að baki fjölþætta reynslu af norrænu samstarfi, auk þess að hafa góða innsýn í sjávarútveg og nýtingu auðlinda hafsins, en sjávarútvegur er undirstöðugrein í atvinnulífi svæðisins. Framkvæmdastjórn NORA valdi Ásmund úr hópi 52ja umsækjenda frá öllum fjórum NORA-löndunum.

Byggðastofnun auglýsir styrki til meistaranema sem vinna að lokaverkefnum á sviði byggðamála, tengdum byggðaáætlun 2014-2017. Til úthlutunar er að þessu sinni allt að 1.000.000 kr. og stefnt er að því að veita fjóra styrki.

Frestur til að sækja um flutningsjöfnunarstyrk vegna kostnaðar við flutning árið 2014 er til 31. mars 2015.

Silja Jóhannesdóttir hefur verið ráðin verkefnastjóri byggðeflingarverkefnisins „Raufarhöfn og framtíðin“. Verkefnið er eitt af átaksverkefnum Byggðastofnunar á landsvísu í samstarfi við atvinnuþróunarfélög og sveitarfélög undir heitinu „Brothættar byggðir“.

Í gær var undirritaður samstarfssamningur Byggðastofnunar, SASS og Skaftárhrepps um verkefnið „Skaftárhreppur til framtíðar“, á fundi verkefnisstjórnar á Kirkjubæjarklaustri.

Þau þrjú framúrskarandi verkefni sem keppa um Eyrarrósina í ár eru Frystiklefinn, Listasafn Árnesinga og Sköpunarmiðstöðin Stöðvarfirði. Hvert þeirra hlýtur flugmiða frá Flugfélagi Íslands og peningaverðlaun. Það kemur síðan í ljós við hátíðlega athöfn á Ísafirði þann 4. apríl hvert þeirra stendur uppi sem Eyrarrósarhafi 2015 og fær í verðlaun 1.650.000.- kr. Dorrit Moussaieff forsetafrú, verndari Eyrarrósarinnar mun afhenda verðlaunin á Ísafirði.

Ársreikningur Byggðastofnunar fyrir árið 2014, var staðfestur af stjórn stofnunarinnar 13. mars 2015. Hagnaður ársins nam 349,2 milljónum króna. Eiginfjárhlutfall í lok júní skv. eiginfjárákvæðum laga nr. 161/2002 um fjármálafyrirtæki var 20,2% en var 16,1% í lok árs 2013.

Byggðastofnun auglýsti eftir umsóknum í nýjan Byggðarannsóknarsjóð í febrúar. Alls bárust 26 umsóknir áður en umsóknarfrestur rann út á miðnætti 8. mars. Einni umsókn var hafnað á þeirri forsendu að hún barst of seint. Til úthlutunar eru 10 m.kr. og samkvæmt reglum sjóðsins er miðað við að styrkirnir séu ekki færri en þrír og ekki fleiri en fimm. Stefnt er að því að tilkynna um úthlutun styrkja á ársfundi Byggðastofnunar þann 10. apríl næstkomandi.

Í ár barst mikill fjöldi umsókna um Eyrarrósina hvaðanæva af landinu. Eyrarrósin er viðurkenning sem veitt er framúrskarandi menningarverkefni á starfssvæði Byggðastofnunnar. Hún beinir sjónum að og hvetur til menningarlegrar fjölbreytni, nýsköpunar og uppbyggingar á sviði menningar og lista. Að verðlaununum standa Byggðastofnun, Flugfélag Íslands og Listahátíð í Reykjavík.

Á fyrsta umsóknarfresti Norðurslóðaáætlunarinnar bárust 20 verkefnaumsóknir og þar af voru 15 með íslenskum þátttakendum. Verkefnisstjórn NPA samþykkti stuðning við 13 verkefni og þar af eru níu með íslenskri þátttöku. Umsóknir í íslenska hlutann voru mun hærri en það fjármagn sem til ráðstöfunar var, sem kom niður á úthlutun.