Fréttir

Til að Dalabyggð geti tekið fagnandi á móti framtíðinni er nauðsynlegt að auka fjölbreytni atvinnutækifæra og efla það sem fyrir er. Forsendur þessa eru bættir innviðir; vegir, fjarskipti, þriggja fasa rafmagn og aukið framboð íbúðar- og atvinnuhúsnæðis. Þetta voru meginskilaboð kraftmikils íbúaþings sem haldið var helgina 26. – 27. mars, þar sem um 50 heimamenn og „hálfbúar“ ræddu um stöðu og tækifæri Dalabyggðar. Þingið markaði upphaf að þátttöku Dalamanna í verkefninu „Brothættar byggðir“, sem er verklag þróað af Byggðastofnun.

Mælaborð Byggðastofnunar um íbúafjölda sveitarfélaga og byggðakjarna hefur verið uppfært með mannfjöldatölum Hagstofu Íslands fyrir 1. janúar 2022. Íbúar á Íslandi eru 376.248 en þar af búa 358.515 (95%) í byggðakjörnum og 17.733 (5%) í dreifbýli. Íbúum landsins fjölgaði um 2,0% frá 1. janúar 2021 en mest fjölgun varð á Suðurlandi (3,3%) og á Suðurnesjum (3,2%).

Ný stefna Íslands í málefnum norðurslóða var samþykkt með þingsályktun á Alþingi 19. maí 2021. Í stefnunni er kveðið á um að utanríkisráðherra móti áætlun um framkvæmd norðurslóðastefnunnar í samráði við aðra hlutaðeigandi ráðherra. Af þessu tilefni hefur utanríkisráðuneytið ákveðið að efna til opins fundar með hagsmunaaðilum þann 31. mars n.k..

Þann 16. mars var boðað til íbúafundar á Borgarfirði eystri í verkefninu Betri Borgarfjörður. Í því sambandi er hægt að tala um tímamót í byggðaþróunarverkefninu. Byggðastofnun dregur sig í hlé og þar með verður ekki um að ræða frekari úthlutun fjármuna frá Brothættum byggðum til verkefnisins. Verkefnisstjóri þess frá upphafi, Alda Marín Kristinsdóttir, lauk við þetta tækifæri einstaklega farsælu starfi sínu sem verkefnisstjóri í Betri Borgarfirði.

Ársreikningur Byggðastofnunar fyrir árið 2021, var staðfestur af stjórn stofnunarinnar 18. mars 2022. Hagnaður ársins nam 167,3 milljónum króna. Eiginfjárhlutfall í lok árs skv. eiginfjárákvæðum laga nr. 161/2002 um fjármálafyrirtæki var 18,17%.

Ákveðið hefur verið að fresta opnun á fyrsta kalli Norðurslóðaáætlunarinnar 2021-2027 sem vera átti 17. mars til 29. apríl en það verður opið til 20 júní og umsóknir afgreiddar 29. september eins og áður hafði verið ákveðið. Jafnframt frestast umsóknarnámskeið sem vera átti á netinu þann 17. mars til 29. apríl. Sjá nánar á heimsíðu áætlunarinnar.

Nú hefur verið birt dagskrá fyrir ráðstefnuna Maturinn, jörðin og við sem haldin verður á hótel Selfossi dagana 7. og 8. apríl. Á ráðstefnunni sem haldin er af félaginu Auður Norðursins í samstarfi við Byggðastofnun og Samband sunnlenskra sveitarfélaga, verður fjallað um tækifæri og áskoranir innan innlendrar matvælaframleiðslu.

Mannfjöldaspá Byggðastofnunar 2021-2070 á sveitarfélagagrunni hefur verið gefin út. Um er að ræða niðurbrot mannfjöldaspár Hagstofu Íslands á sveitarfélög og er þetta í þriðja sinn sem Byggðastofnun gefur út mannfjöldaspá með þessum hætti.

Stöðvarfjörður hefur alla möguleika á að eflast sem ferðamannastaður og menningar- og nýsköpunarbær. Hægt er að styrkja byggðina með því að nýta tækifæri á sem flestum sviðum og byggja á því sem þegar er til staðar. Leggja ætti áherslu á góða aðstöðu til útivistar og fjölskyldusamveru og mikilvægt er að auka framboð á íbúðarhúsnæði. Þetta eru meginskilaboð íbúaþings sem haldið var á Stöðvarfirði, helgina 5. – 6. mars. Með því hófst þátttaka Stöðvarfjarðar í verkefninu „Brothættar byggðir“ og er þetta þrettánda byggðarlagið þar sem unnið er eftir þessu verklagi Byggðastofnunar. Vel var mætt til þings í blíðviðri, en um 60 manns á breiðum aldri tóku þátt.