Fréttir

Eldiskvíar Fiskeldis Austfjarða í Berufirði

Byggðastofnun, Búlandstindur  og Fiskeldi Austfjarða hafa gert með sér samkomulag um aukna byggðafestu á Djúpavogi. Samkomulagið felur í sér samstarf um nýtingu á 400 þorskígildistonna aflaheimildum af Aflamarki Byggðastofnunar auk mótframlags samstarfsaðila í eldis- og bolfiski. Samkomulagið er til 3 ára, með möguleika á framlengingu um 1 ár. 

Verkefnið felur í sér að styðja við og byggja upp heilsárvinnslu sem byggir á sjávarfangi og fiskeldisafurðum og jafna út árstíðabundnar sveiflur í hráefnisöflun í hvorum vinnsluflokknum fyrir sig. Gert er ráð fyrir allt að 1.300 tonna vinnslu á bolfiski og stigvaxandi slátrun á eldisfiski sem verði komið í um 5.000 tonn í lok samningstímabilsins. Vonir standa til að með þessu samkomulagi Byggðastofnunar, Búlandstinds og Fiskeldis Austfjarða sé lagður grunnur að aukinni byggðafestu á Djúpavogi og að stöðugleiki komist á eftir brotthvarf Vísis hf. frá staðnum.

Samkomulag um Aflamark Byggðastofnunar er nú í gildi á eftirtöldum stöðum átta stöðum: Bakkafirði, Breiðdalsvík, Djúpavogi, Drangsnesi, Hrísey,  Raufarhöfn, Suðureyri og Tálknafirði.