Fréttir

"Byggðastofnun, í umboði iðnaðarráðuneytisins, gegnir miklu hlutverki í þeirri viðleitni að skapa landsbyggðinni atvinnutækifæri og umhverfi sem laða að fólk með mismunandi menntun og reynslu. Segja má að þetta hlutverk sé tvíþætt. Annars vegar að vinna að undirbúningi, skipulagi og fjármögnun verkefna sem og veitingu lána og ábyrgða, með fjárfestingum í fyrirtækjum og styrkjum til ýmissa verkefna, sem sagt hin almenna fjármálaumsýsla. Hins vegar er það hlutverk Byggðastofnunar, sem ekki er síður mikilvægt, en það er að vinna að eflingu byggðar, með rannsóknum,gagnaöflun og með ráðgjöf og samstarfi af ýmsu tagi," sagði Herdís Á. Sæmundardóttir, stjórnarformaður Byggðastofnunar í ræðu sinni á ársfundi stofnunarinnar.

Á síðasta ári ákvað ríkisstjórnin að verja 700 milljónum króna til atvinnuátaks á landsbyggðinni. Byggðastofnun var falið að ráðstafa 500 milljónum af þessu fé, 350 milljónumkróna, til fjárfestinga í álitlegum sprotafyrirtækjum og 150 milljónum til aðstyrkja verkefni, sem líkleg væru til að styrkja grunngerð viðkomandi samfélags. Í ársskýrslu stofnunarinnar kemur fram að átakið geti skilað 7-800 nýjum störfum, gangi öll þau verkefni eftir sem fengu styrk.

Á ársfundi Byggðastofnunar fjallaði Aðalsteinn Þorsteinsson, forstjóri, um fjárhagsstöðu hennar og sagði nauðsynlegt að styrkja eiginfjárstöðuna. Vegna mikilla afskrifta hafi eiginfjárstaða stofnunarinnar versnað stig af stigi frá árinu 2001 en vonir stjórnenda stofnunarinnar standi til að botninum sé náð hvað þetta varðar.