Fréttir

Í maí sl. var auglýst eftir umsóknum um þátttöku í verkefninu um framtíð brothættra byggða. Í auglýsingu kom fram að meginmarkmið verkefnisins á hverjum stað skyldu „ skilgreind af verkefnisstjórn á grundvelli umræðna og forgangsröðunar á íbúaþingum sem ætlað er að virkja frumkvæði íbúa og samtakamátt.“ Einnig kom fram að umsókn þyrfti að vera sameiginleg frá sveitarfélagi, landshlutasamtökum sveitarfélaga/atvinnuþróunarfélagi og íbúasamtökum, þar sem þau væru til staðar.

Norræna Atlantssamstarfið, NORA, styrkir samstarf á Norður-Atlantshafssvæðinu. Í því augnamiði veitir NORA verkefnastyrki tvisvar á ári til verkefna sem eru í samstarfi a.m.k. tveggja aðildarlanda, en löndin innan NORA eru Ísland, Grænland, Færeyjar og strandhéruð Noregs. Nú óskar NORA eftir styrkumsóknum með umsóknarfrest þann 6. október 2014.

Byggðaráðstefna Íslands verður haldin á Patreksfirði 18.-20. september 2014 nk. og stendur skráning yfir. Byggðaráðstefnu Íslands er ætlað að vera vettvangur nýrra rannsókna, reynslu af hagnýtu starfi og umræðu um stefnumótun í sjórnsýslu og stjórnmálum

Skrá yfir staði ríkisstarfa sem birt var á heimasíðu Byggðastofnunar 25. ágúst sl. hefur vakið talsverða athygli og umræðu. Skráin hefur nú verið uppfærð í kjölfar ábendinga sem borist hafa Byggðastofnun. Þannig hefur starfsemi framhaldsskóla verið skipt þannig að í sérstakan flokk eru settir staðir með tveggja ára skóla og dreifnám með starfsmanni sem hefur tengsl við ákveðinn framhaldsskóla. Þýðingarstofur eða –miðstöðvar hafa verið færðar í einn flokk og tveimur stofnunum hefur verið bætt við í Reykjavík.

Staðsetning starfa á vegum ríkisins er oft nefnd sem byggðamál en líklega sjaldan í samhengi við Reykjavík sem þó hefur notið stórkostlegs byggðastuðnings stjórnvalda að þessu leyti. Reykjavík er aðsetur langflestra starfsþátta á vegum ríkisins eins og sést á meðfylgjandi töflu, einkum þeirra sem hafa landið allt að vettvangi og marga starfsmenn. Þetta er alkunna og niðurstaða í könnun á staðsetningu ríkisstarfa kemur ekki á óvart.

Árshlutareikningur Byggðastofnunar fyrir tímabilið janúar – júní 2014, var staðfestur af stjórn stofnunarinnar 22. ágúst 2014.

Á ársfundi Norræna Atlantssamstarfsins, NORA, sem haldinn var í Nuuk á Grænlandi þann 3. júní sl. var samþykkt að styrkja níu samstarfsverkefni, öll með íslenskri þátttöku.

Í skýrslunni Staða Norðurlandanna 2013, sem unnin er af Nordregio og gefin var út fyrr á árinu, er umfangsmikil greining á norrænni svæðaþróun. Hún beinist aðallega að lýðfræðilegum breytingum, atvinnumálum og hagrænni þróun á norræna svæðinu. Skýrslan varpar ljósi á hversu vel Ísland stendur í norrænu samhengi.

Fasteignamat íbúðarhúsnæðis hefur hækkað mjög mis mikið í prósentum á milli áranna 2010 og 2014 eftir einstökum þéttbýlisstöðum. Mest hefur hækkun matsins í prósentum verið í Vestmannaeyjum 70,6% og næst mest á Höfn í Hornafirði og á Siglufirði 64,1%. Þetta eru einu staðirnir þar sem hækkunin er yfir 50%. Hólmavík liggur þó nærri með 48,7% hækkun en engir aðrir staðir ná 40% hækkun.

Frá því að umræða um þróunarverkefni Byggðastofnunar, Norðurþings, Atvinnuþróunarfélags Þingeyinga, Háskólans á Akureyri og íbúa Raufarhafnar hófst, á vormánuðum 2012, hefur ýmislegt verið til umfjöllunar og árangur náðst í nokkrum málum en minni í öðrum.