Fréttir

Samkvæmt byggðaáætlun fyrir árin 2014 – 2017 skal gera úttekt á leiðum sem nýttar eru í nágrannalöndum til að styðja við einstaklinga búsetta á svæðum sem eiga undir högg að sækja. Því fóru tveir starfsmenn Byggðastofnunar og einn starfsmaður samgöngu- og sveitarstjórnarráðuneytisins til Noregs til að kynna sér stöðu byggðamála í Noregi, norska byggðastefnu og byggðaaðgerðir. Er óhætt að segja að byggðastefna Norðmanna sé metnaðarfull og miklum fjármunum varið til byggðaaðgerða.

Árleg ráðstefna Norðurslóðaáætlunarinnar (NPA) var haldin 21. september síðastliðinn í Galway á Írlandi. Yfirskrif ráðstefnunnar í Galway var Blue Opportunities: The Marine Economy in the NPA. Um 130 þátttakendur frá 12 löndum voru samankomnir til að fjalla um tækifæri og vaxtamöguleika sem til staðar eru í sjávarlífhagkerfinu sem er mikilvægt fyrir NPA-löndin sem deila auðlindum Atlantshafsins.

Málþingið Innanlandsflug sem almenningssamgöngur verður haldið 4. október 2017 á Hótel Natura í Reykjavík kl. 13.00 – 15:30. Allir eru velkomnir.

Ef þú ert frumkvöðlakona á landsbyggðinni þá getur þú skráð þig í netþjálfun, tekið þátt í vinnustofufundum og aukið tengslanet þitt. Þátttaka er konum að kostnaðarlausu.

Lánasérfræðingar Byggðastofnunar verða á ferðinni á Vestfjörðum dagana 25. - 28. september nk.

Verkefnastyrkir frá Norræna Atlantssamstarfinu (NORA) haust 2017. NORA auglýsir eftir umsóknum um verkefnastyrki með umsóknarfrest til og með mánudagsins 2. október 2017. Umsækjendum er bent á lágmarkskröfu NORA um að tvö aðildarlönd séu þátttakendur í samstarfsverkefnum sem hljóta styrki. Það eru þessi lönd: Grænland, Ísland, Færeyjar og strandhéruð Noregs. Hámarksstyrkur NORA eru 500 þúsund danskar krónur á ári að hámarki í þrjú ár.

Byggðastofnun, í samstarfi við Nýsköpunarmiðstöð Íslands, hefur hleypt af stokkunum nýjum lánaflokki. Nýsköpunarlán munu skapa grundvöll til aukinnar nýsköpunar og þar með aukinna atvinnutækifæra í landsbyggðunum. Aðgengi að fjármagni til nýsköpunar utan höfuðborgarsvæðisins hefur verið takmarkað og frumkvöðlar talið lítinn stuðning þar að finna. Nýsköpunarlánum er ætlað að bæta úr þessu með bættu aðgengi að lánsfjármagni.

Á síðasta ári vann Byggðastofnun samantekt um dreifingu sauðfjár á Íslandi. Það var gert í framhaldi af nýjum búvörusamningum sem undirritaðir voru í febrúar 2016. Þar sem skapalón að þessari vinnu var til staðar hjá stofnuninni og blikur eru á lofti varðandi framtíð sauðfjárbúskaparins var ákveðið að kalla að nýju eftir gögnum frá Matvælastofnun og gera samanburð á haustásetningi ársins 2015 og 2016. Einnig þótti æskilegt að taka stöðuna eins og hún er þar sem að miklar breytingar á sauðfjárbúskap gætu átt sér stað á næstu misserum.

Menningarlandið 2017 - ráðstefna um barnamenningu, sem haldin verður í menningarhúsinu Bergi, Dalvík 13. - 14. september 2017. Megintilgangur ráðstefnunnar verður að fjalla um barnamenningu og mikilvægi menningaruppeldis eins og menningarstefna stjórnvalda frá 2013 leggur áherslu á. Ráðstefnan er haldin í samvinnu Mennta- og menningarmálaráðuneytisins, Byggðastofnunar, Sambands íslenskra sveitarfélaga og Eyþings.

Menntahluti Erasmus+ áætlunar Evrópusambandsins veitti nýverið styrki til fjölþjóðlegra samstarfsverkefna og mun Byggðastofnun leiða eitt þeirra. Verkefnið nefnist Innovation and Entrepreneurship for Fragile Communities in Europe og hefur fengið skammstöfunina INTERFACE. Nafnið má þýða sem Nýsköpun og frumkvöðlastarf í brothættum byggðarlögum í Evrópu.