Fréttir

Ársfundur Byggðastofnunar var haldinn á Siglufirði fimmtudaginn 11. apríl 2019. Illugi Gunnarsson fráfarandi formaður stjórnar Byggðastofnunar setti ársfundinn og síðan flutti ráðherra byggðamála, Sigurður Ingi Jóhannsson, ávarp. Að því loknu fór Aðalsteinn Þorsteinsson forstjóri yfir starfsemi stofnunarinnar á liðnu starfsári. Í máli hans kom fram að starfsemi Byggðastofnunar gekk mjög vel á árinu 2018 og skilaði góðum afgangi.

Á ársfundi Byggðastofnunar sem haldinn var á Siglufirði fimmtudaginn 11. apríl, var Landstólpinn, samfélagsviðurkenning Byggðastofnunar, afhentur í níunda sinn. Að þessu sinni hlaut Blábankinn á Þingeyri viðurkenninguna.

Samgöngu- og sveitarstjórnarráðherra hefur úthlutað styrkjum til sex landshlutasamtaka sveitarfélaga til sjö verkefna. Styrkirnir eru veittir á grundvelli stefnumótandi byggðaáætlunar fyrir árin 2018-2024. Að þessu sinni var 71,5 milljónum króna úthlutað fyrir árið 2019 til sértækra verkefna á sóknaráætlunarsvæðum. Alls bárust 19 umsóknir um styrki að fjárhæð rúmar 278 m.kr. fyrir árið 2019.

Mikill baráttu- og samstarfsvilji ríkir á Bakkafirði, en helgina 30. – 31. mars sl., var haldið þar vel heppnað tveggja daga íbúaþing, sem markar upphaf að þátttöku samfélagsins á Bakkafirði í verkefni Byggðastofnunar, Brothættar byggðir. Að verkefninu standa íbúar á Bakkafirði og nærsveitum, Langanesbyggð, Eyþing og Atvinnuþróunarfélag Þingeyinga, ásamt Byggðastofnun. Íbúar völdu verkefninu heitið „Betri Bakkafjörður“.

Fimmtudaginn 11. apríl klukkan 13:00 á Siglufirði. Allir velkomnir.

Könnunin Byggðafesta og búferlaflutningar: Bæir og þorp á Íslandi er hluti rannsóknarverkefnis á vegum Byggðastofnunar í samstarfi við rannsóknafólk við innlenda og erlenda háskóla. Könnuninni er ætlað að safna margvíslegum upplýsingum sem aukið geta skilning á málefnum minni byggðarlaga og stutt við stefnumótun og aðgerðir í byggðamálum.

Á stjórnarfundi NPA sem haldinn var í Sundsvall í Svíþjóð um miðjan mars sl. var samþykkt að styrkja sex samstarfsverkefni. Íslenskir aðilar taka þátt í þremum þeirra, alls nemur styrkfjárhæðin um 2,8 milljónir evra en heildarkostnaður um 4,7 milljónir evra.

Ársreikningur Byggðastofnunar fyrir árið 2018, var staðfestur af stjórn stofnunarinnar 22. mars 2019. Hagnaður ársins nam 113,4 milljónum króna. Eiginfjárhlutfall í lok árs skv. eiginfjárákvæðum laga nr. 161/2002 um fjármálafyrirtæki var 21,45%.

Helgina 30. – 31. mars er íbúum, fjarbúum og öðrum hagsmunaaðilum samfélagsins við Bakkaflóa boðið til íbúaþings. Þingið markar upphaf að samtali við íbúa í verkefni Byggðastofnunar Brothættum byggðum. Verkefnið er samstarfsverkefni íbúa á Bakkafirði, Langanesbyggðar, Eyþings, Atvinnuþróunarfélags Þingeyinga og Byggðastofnunar. Fulltrúar þessara aðila skipa verkefnisstjórn.

Fyrsti fundur nýskipaðrar verkefnisstjórnar í byggðaþróunarverkefninu Brothættar byggðir á Bakkafirði var haldinn í skólahúsnæðinu á Bakkafirði föstudaginn 15. mars. Á fundinum var farið yfir verklag í Brothættum byggðum og það rætt hvernig verkefnið geti nýst samfélaginu á Bakkafirði.