Fréttir

Byggðastofnun var rekin með 7 milljóna króna rekstrarafgangi árið 2003. Þetta kemur fram í ársskýrslu stofnunarinnar sem kynnt var á ársfundi á dögunum. Eigið fé í árslok var 1.699 m.kr. en var 1.692 m.kr. í árslok 2002. Eiginfjárhlutfall er 10,85% í árslok 2003 og hefur lækkað úr 16,45% í árslok 2001

Verkefnið Rural Business Women er samstarfsverkefni fjögurra þjóða: Finnlands, Svíþjóðar, Skotlands og Íslands, en er undir stjórn Finna. Verkefninu er ætlað að efla atvinnusköpun kvenna í dreifbýli, sem lýtur að nýtingu náttúruauðlinda í víðum skilningi. Þá er átt við gæði lands og sjávar, jafnt hvað varðar framleiðslu og þjónustu sem byggir á náttúruauðlindum. Það verður gert meðal annars með rannsóknum, fræðslu og stuðningi við smáfyrirtæki kvenna auk markaðsgreiningar og markaðssetningar náttúruafurða.

Það var hátíðleg stund þegar 58 konur  úr NV-kjördæmi voru útskrifaðar úr ,,Mætti kvenna” frá Viðskiptaháskólanum á Bifröst, sunnudaginn 9. maí sl. , að viðstöddum iðnaðar- og viðskiptaráðherra ásamt fleiri gestum.

 Vorið 2002 gerðust Íslendingar aðilar að Norðurslóðaáætlun ESB NPP (Northern Periphery Programme). Áætlunin nær til  norðlægra svæða í Finnlandi, Svíþjóð, Noregi og Skotlandi, en einnig til Grænlands, Færeyja og Íslands. Meginmarkmið áætlunarinnar er að stuðla að eflingu atvinnu- og efnahagslífs svæða og byggða með svipaðar aðstæður, með samstarfsverkefnum yfir landamæri á milli einstaklinga, fyrirtækja og stofnana í þessum landshlutum. Reynt er að koma í veg fyrir að landamæri þjóðríkja sé hindrun í samstarfi og framþróun byggða og atvinnulífs með það að markmiði  að tækifæri og styrkleikar svæðanna fái notið sín sem best.