Fréttir

Iðnaðar- og viðskiptaráðherra hefur tilkynnt um niðurstöður valnefndar í samkeppni um ,,Rafrænt samfélag“. Í þingsályktun um byggðamál kemur fram að efnt skuli til samkeppni um ,,Rafrænt samfélag“.  Byggðastofnun var falið að efna til samkeppninnar um uppbyggingu rafrænna samfélaga.  Fyrir valinu urðu tvö verkefni. Annars vegar samstarfsverkefni þriggja sveitarfélaga  Árborgar, Hveragerðis og Ölfuss. Nafn verkefnisins er ,,Sunnan 3-Þekkingarsamfélag á grunni styrkrar staðsetningar".  Hins vegar samstarfsverkefni Aðaldælahrepps, Húsavíkurbæjar og Þingeyjarsveitar sem munu vinna í sameiningu að verkefni sem hefur fengið vinnuheitið ,,Virkjum alla“.

Byggðastofnun og Félag ferðamálafulltrúa á Íslandi hafa lokið við könnun og skýrslu um rekstrar- og starfsumhverfi upplýsingamiðstöðva á Íslandi. Markmið könnunarinnar var að fá upplýsingar um rekstrarfjármögnun, launakostnað og sértekjur upplýsingamiðstöðva og hvað felst í þeirri þjónustu sem upplýsingamiðstöðvar veita gestum, ferðaþjónustu- og/eða rekstraraðilum.  Auk þess að kanna hvaða viðhorf og væntingar umsjónaraðilar upplýsingamiðstöðva höfðu í tengslum við samstarf, markaðssetningu, veikleika og styrkleika ferðaþjónustunnar.

Hjá Byggðastofnun stendur nú yfir vinna við styrk- og veikleikagreiningu (SVÓT) fyrir sjávarbyggðir og landbúnaðarkjarna. Í skýrslu sem kom út hjá Byggðastofnun í október 2001 var gerð grein fyrir slíkri greiningu á landshlutum en með greiningunni nú er ætlunin að fá gleggri mynd af einstökum byggðarlögum.

Iðnaðar- og viðskiptaráðherra hefur skipað Herdísi Á. Sæmundardóttur formann stjórnar Byggðastofnunar og tekur hún við stöðunni af Jóni Sigurðssyni sem skipaður hefur verið bankastjóri Seðlabanka Íslands. Herdís tók sæti í stjórn Byggðastofnunar á ársfundi í júní en í stað Jóns í stjórn stofnunarinnar hefur ráðherra skipað Elísabetu Benediktsdóttur, starfsmanns hjá Þróunarstofu Austurlands.

Vorið 2002 gerðust, Íslendingar aðilar að Norðurslóðaáætlun ESB NPP (Northern Periphery Programme) með samþykkt Alþingis á þingsályktun um stefnu í byggðamálum fyrir árin 2002 - 2005. Framlag íslenskra stjórnvalda til áætlunarinnar eru 25 milljónir á ári og eru þau verkefni sem Íslendingar taka þátt í styrkt af þessu framlagi, en verkefnin njóta einnig framlaga og þátttöku samstarfsaðila frá öðrum löndum áætlunarinnar.  NPP byggðaáætlunin er rekin á svipuðum forsendum og rannsóknaráætlanir innan EES-samningsins þ.e. byggja verður á hagnýtum hugmyndum og rannsóknum. Einstök verkefni fá síðan stuðning, eftir mat sérfræðinga í öllum aðildarlöndunum og er stuðningur einnig háður a.m.k. 40% - 50% mótframlagi umsóknaraðila.

Á stjórnarfundi NORA í lok maí sl. var ákveðið að styrkja 18 ný verkefni á vegum NORA, og taka íslenskir aðilar þátt í 14 verkefnum eða 78% allra verkefna, sem telja verður mjög góðan árangur.  NORA er skammstöfun sem stendur fyrir Nordisk Atlantsamarbejde og kallast Norræna Atlantsnefndin á íslensku. Nefndin heyrir undir Norrænu ráðherranefndina og telst vera hluti af norrænu samstarfi á sviði byggðamála og svæðasamvinnu.

“Það verður þörf fyrir Byggðastofnun um fyrirsjáanlega framtíð. Byggðastofnun er hlekkur keðjunnar í fjölþættu gróskuríku þjóðlífi á framtíðarbraut. Það verður áfram þörf fyrir rannsóknar- og ráðgjafarstöð og fjárfestingarlánastofnun á þessu sviði. Í þessu er engin þversögn. Allir þessir þættir verða til að koma í gróskuvænlegu þjóðrækilegu framtíðarsamfélagi,” sagði Jón Sigurðsson, formaður stjórnar Byggðastofnunar á ársfundi hennar á Höfn í Hornafirði, á dögunum. Í erindi sínu lagði stjórnarformaðurinn áherslu á breytt hlutverk stofnunarinnar og vönduð vinnubrögð við meðferð mála hjá stofnuninni.

Á ársfundi Byggðastofnunar kom fram að jafnan eru umsóknarerindi hjá stofnuninni sem nema þreföldum þeim fjárhæðum sem eru til ráðstöfunar þegar um lánveitingar er að ræða, og fimmtán-földum þeim fjárhæðum sem eru til ráðstöfunar varðandi styrki og samfjármögnun. Þetta kallar á forgangsröðun  sérfræðinga stofnunarinnar við allar allar ákvarðanir og tillögur sínar. Hafna verður mörgum erindum og forgangsröðunin verður að lúta jafnræðisreglu og málefnalegu gegnsæi.

Í ræðu Aðalsteins Þorsteinssonar, forstjóra Byggðastofnunar, á ársfundi stofnunarinnar á Höfn í Hornafirði kom fram að á liðnu ári var verulegur halli á stofnuninni, eða sem nam 408 milljónum króna.