Fréttir

Þriðjudaginn 31. maí komu fulltrúar atvinnuþróunarfélaganna, vaxtarsamninganna og Byggðastofnunar saman til árlegs vorfundar. Mætt var frá öllum ofangreindum aðilum til fundarins sem haldinn var á Grand Hótel í Reykjavík.

Miðvikudaginn 8. Júní  kl. 13:00 – 17:00 verður haldin ráðstefnan Landsbyggð tækifæranna - Þekkingar- og fræðastarf á landsbyggðinni á  Grand Hótel, Sigtúni 38, Reykjavík (Háteigur A, 4 hæð). Tilefni ráðstefnunnar er skýrsla Byggðastofnunar um Þekkingarsetur á Íslandi og nú er ætlunin að móta áframhald þess verkefnis m.a. í tengslum við áherslur Vísinda- og tækniráðs og sóknaráætlanir landshluta (Ísland 2020).

Ársfundi Byggðastofnunar sem halda átti í Vestmannaeyjum miðvikudaginn 25. maí hefur verið frestað um óákveðinn tíma.  Þessi ákvörðun er tekin með hliðsjón af eldgosinu í Grímsvötnum og áhrifum þess á samgöngur á svæðinu.

Grettir BA, nýtt skip Þörungaverksmiðjunnar hf. lagðist að bryggju á Reykhólum, sunnudaginn 15. maí sl.  Skipið hét áður Fossá ÞH og var kúfiskveiðiskip.  Skipið leysir af hólmi skipið Karlsey BA sem þjónað hefur Þörungaverksmiðjunni um langt árabil. Fjöldi fólks var við Reykhólahöfn að fagna komu Grettis. Slippurinn á Akureyri sá um endurbæturnar en meðal annars var skipt um brú, lestin stækkuð, skipt var úr fastri skrúfu í skiptiskrúfu, stýrisbúnaður endurnýjaður og keyptur öflugur krani.

Ársfundur Byggðastofnunar 2011 verður haldinn miðvikudaginn 25. maí nk. í Höllinni Vestmannaeyjum. Fundurinn hefst kl. 12:00 með léttum veitingum, og fundarlok eru kl. 16:00. Að loknum hefðbundnum liðum verður haldin ráðstefna undir yfirskriftinni ,,Sóknaráætlanir landshluta og stoðkerfi atvinnulífsins"

Byggðastofnun hefur fengið Þjóðskrá Íslands til að reikna út fasteignamat og fasteignagjöld á sömu fasteigninni á nokkrum þéttbýlisstöðum á landinu.  Viðmiðunareignin er einbýlishús sem er 161,1 m2 að grunnfleti og 351m3. Stærð lóðar er 808m2. Gjöldin eru reiknuð út samkvæmt núgildandi fasteignamati sem gildir frá 31. desember 2010 og samkvæmt álagningarreglum ársins 2011 eins og þær eru í hverju sveitarfélagi.

Í mars 2010 veitti Byggðastofnun fjórum hönnuðum styrk til markaðssetningar erlendis. Nú rúmu ári síðar hefur velta í einu fyrirtækinu aukist um 100% og um 80% í öðru og alls hefur stöðugildum fjölgað um 50% ,,Styrkurinn markaði upphaf útflutnings hjá fyrirtækinu og hefur skipt sköpum fyrir framgang vörunnar erlendis″ (styrkþegi).

Ársfundur Byggðastofnunar verður haldinn í Vestmannaeyjum miðvikudaginn 25. maí nk. Á fundinum verður í fyrsta sinn veitt viðurkenning Byggðastofnunar undir heitinu „Landstólpinn. Samfélagsviðurkenning Byggðastofnunar“.

Á lokafundi samráðsvettvangs sveitarfélaga á Suðurnesjum og stjórnvalda miðvikudaginn 27. apríl, undirrituðu formaður stjórnar Sambands Sveitarfélaga á Suðurnesjum og Aðalsteinn Þorsteinsson forstjóri Byggðastofnunar f.h. stjórnvalda undir samning um stofnun Atvinnuþróunarfélags Suðurnesja. Með samningnum er lagður grundvöllur að 4 stöðugildum atvinnuráðgjafa, og leggja Byggðastofnun og Iðnaðarráðuneytið samtals rúmlega 20 mkr. til samningsins á ári.

Svæðaráðstefna NORA verður haldin í Kaupmannahöfn þriðjudaginn 5. apríl nk. Þar verður kynnt greining sem OECD gerði á starfsvæði NORA sem er Ísland, Grænland, Færeyjar og Noregur. Ráðstefnan er öllum opin. Nánari upplýsingar er að finna á heimasíðu NORA.