Fréttir

Í mars 2010 veitti Byggðastofnun fjórum hönnuðum styrk til markaðssetningar erlendis. Nú rúmu ári síðar hefur velta í einu fyrirtækinu aukist um 100% og um 80% í öðru og alls hefur stöðugildum fjölgað um 50% ,,Styrkurinn markaði upphaf útflutnings hjá fyrirtækinu og hefur skipt sköpum fyrir framgang vörunnar erlendis″ (styrkþegi).

"Styrkurinn hefur sannarlega verið fyrirtækinu mínu til framdráttar og þar með atvinnulífinu á landsbyggðinni.  Ef ekki hefði komið til þessi styrkur þá hefði ég klárlega ekki látið verða af að kanna möguleika erlendis.  Töluverður fjárhagslegur styrkur en ekki síður hvatning og spark í rassinn við að koma sér af stað og skoða málin fyrir alvöru" (styrkþegi)

Eftirtaldir hönnuðir fengu tveggja milljóna króna styrk til markaðssetningar erlendis.

Kurlproject

Erna Óðinsdóttir klæðskeri rekur klæðskeraverkstæðið Kurl & kram á Flúðum.  Styrkurinn var nýttur til að taka þátt í tískuvikum í Kaupmannahöfn árin 2010 og 2011.  Mikill áhugi var á vörunum á sýningunum og tóku sjö verslanir inn kurlproject vörur, tvær í Danmörku, þrjár í Noregi, ein í Finnlandi og ein á Grænlandi.  Í kjölfar tískusýninganna var m.a. í fjallað um hönnuðinn og kurlproject tískutímaritunum Collezoni og Donna.  Velta fyrirtækisins jókst um 80% og í fyrirtækinu starfa fjórar konur, í þremur stöðugildum.

Mynstrað Munngæti

Hugrún Ívarsdóttir er sjálfstætt starfandi hönnuður.  Styrkurinn var nýttur til markaðssetningar á vörulínunni á Íslendingaslóðum í Kanada, í Finnlandi og Noregi.  Tvær blaðagreinar birtust í Lögbergi Heimskringlu.  Í Kanada er varan nú í sölu hjá New Iceland Heritage Museum í Gimli.  Í Finnlandi er varan til sölu hjá Lapuan kankurit í Lapua.  Í vinnslu er ný vörulína sem er sniðin að norskum markaði sem  byggir á  hönnun og hugmyndafræði Hugrúnar.  Búið er að semja við dreifingaraðila í Noregi.  Velta fyrirtækisins hefur aukist um 15%, í fyrirtækinu er eitt og hálft stöðugildi.  http://www.merkilegt.is/ 

Handlers ehf.

Bjarndís H. Mitchell sérhannar sýningartaumar fyrir hunda.  Styrkurinn var m.a. nýttur til að taka þátt í sýningum í London og í Danmörku.  Árangurinn er m.a. sá að taumarnir eru komnir í sölu hjá tveimur umboðsaðilum í Bretlandi, hjá einum umboðsaðila í Hollandi, Þýskalandi, Austurríki, Sviss, Belgíu, Luxemborg, Svíþjóð, Noregi og Ungverjalandi.  Umfjöllun um Handlers birtist Your Dog Magazine.  Velta fyrirtækisins hefur aukist um 100% og hjá fyrirtækinu starfa tveir starfsmenn í tveimur stöðugildum.  http://www.originalhandlers.com/

Úr hreiðri í sæng

Helga Björg Ingimarsdóttirframleiðir dúnsængur.  Styrkurinn var nýttur til markaðssetningar í Þýskalandi og Kanada. Liður í markaðssetningu er gerð kynningarmyndar sem Plús Film framleiðir.   Myndin er tekin í varplandinu og sýnir ferlið frá því að varpið er undirbúið fyrir æðarfuglinn, varpið sjálft og tínsluna á dúninum, hreinsunarferlið og framleiðslu á sængunum.    Veltan hjá fyrirtækinu er sú sama og enn sem komið er hálft stöðugildi.   http://www.hafnir.is/