Fréttir

Grettir BA, nýtt skip Þörungaverksmiðjunnar hf. lagðist að bryggju á Reykhólum, sunnudaginn 15. maí sl.  Skipið hét áður Fossá ÞH og var kúfiskveiðiskip.  Skipið leysir af hólmi skipið Karlsey BA sem þjónað hefur Þörungaverksmiðjunni um langt árabil. Fjöldi fólks var við Reykhólahöfn að fagna komu Grettis. Slippurinn á Akureyri sá um endurbæturnar en meðal annars var skipt um brú, lestin stækkuð, skipt var úr fastri skrúfu í skiptiskrúfu, stýrisbúnaður endurnýjaður og keyptur öflugur krani.

Þörungaverksmiðjan hf. framleiðir mjöl úr klóþangi (Ascophyllum nodosum) og hrossaþara (Laminaria digitata) sem sótt er til vinnslu víðs vegar úr Breiðafirði. Klóþangs er aflað með sérstökum þangsláttuvélum. Mjölið er selt víða um heim en stærstu markaðirnir eru í Evrópu og Norður-Ameríku. Mjölið er notað sem fóður og áburður en einnig notað í margvíslegar vörur eins og íblöndunarefni fyrir lyfhylki.  Mjölið veldur því einnig að bjór freyðir betur.

Byggðastofnun á tæplega 28% hlut í Þörungaverksmiðjunni, en stærsti eigandi fyrirtækisins er bandaríska fyrirtækið FMC Corporation.

Þörungaverksmiðjan hf. tók formlega á móti vottun þann 14. júní árið 1999 þess efnis að framleiðsla verksmiðjunnar sé lífrænt vottuð. Það er Vottunarstofan Tún ehf. sem vottar framleiðslu Þörungaverksmiðjunnar hf. Vottunarstofan Tún er jafnframt eftirlitsaðili fyrir bandarísku vottunarstofuna Quality Assurance International (QAI) sem jafnframt hefur heimilað Þörungaverksmiðjunni að nota vörumerki sitt.

Hér má sjá myndir af komu skipsins af heimasíðu Reykhólahrepps.

Hér má sjá myndir af Gretti BA við prufusiglingu í Eyjafirði af heimasíðu Þorgeirs Baldurssonar.

Heimasíða Þörungaverksmiðjunnar.