Fréttir

Á lokafundi samráðsvettvangs sveitarfélaga á Suðurnesjum og stjórnvalda miðvikudaginn 27. apríl, undirrituðu formaður stjórnar Sambands Sveitarfélaga á Suðurnesjum og Aðalsteinn Þorsteinsson forstjóri Byggðastofnunar f.h. stjórnvalda undir samning um stofnun Atvinnuþróunarfélags Suðurnesja. Með samningnum er lagður grundvöllur að 4 stöðugildum atvinnuráðgjafa, og leggja Byggðastofnun og Iðnaðarráðuneytið samtals rúmlega 20 mkr. til samningsins á ári.

Gert er ráð fyrir að Samband sveitarfélaga á Suðurnesjum afli mótframlaga og sjái að öðru leyti um fjármögnun starfseminnar eins og tíðkast í atvinnuþróunarfélögum annarra landshluta.  Verkefni félagsins verða fjölbreytt, á sviði atvinnu og byggðaþróunar auk verkefna á sviði nýsköpunar.  Þannig mun félagið sjá um rekstur vaxtarsamnings á Suðurnesjum.  Atvinnuþróunarfélag Suðurnesja mun taka þátt í og vera í forystu um uppbyggingu þekkingarseturs á Suðurnesjum með þeim stofnunum á Suðurnesjum sem eru hluti þekkingarsamfélagsins á svæðinu. Gert er ráð fyrir að í þessu samstarfi taki þátt stofnanir stoðkerfisins sem starfa á vegum ráðuneyta, menntastofnanir innan og utan svæðis sem og aðrir aðilar sem stutt geta við atvinnulíf og vöxt á svæðinu.  Skal félagið beita sér fyrir sem nánustu samstarfi allra aðila í stoðkerfinu á Suðurnesjum og koma þannig í veg fyrir tvíverknað og árekstra. Ætlunin er að félagið verði fyrsti viðkomustaður þeirra sem til stoðkerfisins leita og vísa aðilum þangað sem aðstoð er að fá í hverju tilviki.

Stjórn S.S.S. fagnar þessum samningi og telur að með stofnun atvinnuþróunarfélags sveitarfélaga á Suðurnesjum sé stigið mikið framfaraskref í atvinnuuppbyggingu á Suðurnesjum. Mikið verkefni bíður félagsins á næstu vikum og mánuðum og vonandi mun atvinnuþróunarfélagið styðja við og flýta fyrir atvinnuuppbyggingu á Suðurnesjum.