Fréttir

Ársfundur Byggðastofnunar var haldinn 31. maí sl. í Rúgbrauðsgerðinni, Borgartúni 6.  Fjölmörg erindi voru flutt og má nálgast efni fundarins hér.

Síðustu fjögur ár hefur Byggðastofnun haft samninga við átta atvinnuþróunarfélög á landinu. Í þessum samningum eru viðfangsefni félaganna skilgreind ásamt samstarfi þeirra og Byggðastofnunar. Í samræmi við þá er fjármagni sem Alþingi veitir til atvinnuþróunar deilt út til félaganna og nú stendur fyrir dyrum endurskoðun þessara samninga. Af því tilefni skipulagði Byggðastofnun kynnisferð til Jótlands frá 1. til 4. maí sl. með þátttöku frá öllum atvinnuþróunarfélögunum, Byggðastofnun og Impru nýsköpunarmiðstöð. Ferðin var einkar vel heppnuð, alls staðar frábærar móttökur og erindi.

Byggðastofnun hefur selt eignarhlut sinn í nýsköpunarfyrirtækinu Rennex á Ísafirði.  Rennex hefur sérhæft sig í framleiðslu á renndum og fræstum íhlutum bæði úr plasti og málmi, fyrir tækjabúnað í matvælaframleiðslu.  Rekstur félagsins hefur gengið vel, en meðal stærstu viðskiptavina má nefna fyrirtækin 3xStál, Marel og Sæplast. 

Laugardaginn 28. apríl sl. tók Kalkþörungaverksmiðjan á Bíldudal formlega til starfa.  Helstu eigendur hennar eru Celtic Sea Minerals á Írlandi og Björgun ehf. í Reykjavík.  Byggðastofnun kom að fjármögnun verksmiðjunnar á Bíldudal.  Hráefni til vinnslunnar, kalkþörungum, verður dælt úr Arnarfirði , allt að 82.500 m3 á ári. Því verður landað á Bíldudal þar sem unnið er úr efninu og því  pakkað til útflutnings.  Varan verður einkum seld á bandaríkjamarkað.

Nú í aðdraganda kosninga heyrist því stundum haldið fram að ekki sé byggðastefna á Íslandi, eða þá að ef hún sé fyrir hendi þá sé hún í öllu falli arfavitlaus, og mætti þannig álykta að um hana væri mikill ágreiningur.  En svo er ekki þegar betur er að gáð.  Byggðastefna stjórnvalda er sett fram í formi þingsályktunar á Alþingi til 4 ára í senn, nú síðast fyrir um einu ári síðan fyrir árin 2006-2009.

Fyrsta forverkefnisstefnumót Norðurslóðaáætlunar 2007-2013 verður haldið í Derry Norður Írlandi dagana 24.-26. apríl.

Vinnumálastofnun og félagsmálaráðuneytið hafa auglýst styrki til atvinnumála kvenna.

Á miðvikudaginn í síðustu viku voru fulltrúar Byggðastofnunar viðstaddir prufukeyrslu á vélum nýrrar Kalkþörungaverksmiðju á Bíldudal, en Byggðastofnun hefur annast innlenda lánsfjármögnun verkefnisins.  Uppsetning verksmiðjunnar hefur gengið að óskum og er verkið á áætlun. 

Eyrarrósin 2007 kom í hlut Strandagaldurs og var hún afhent við hátíðlega athöfn á Bessastöðum í dag í þriðja sinn en Strandagaldur hefur m.a. að geyma Galdrasafnið á Hólmavík, Kotbýli kuklarans og Þjóðtrúarstofuna á Ströndum þar sem saman hefur verið dregin vitneskja um 17. öldina, þjóðsagnir, hugmyndaheim og menningararf Strandasýslu sem tengist göldrum.

Ársreikningur Byggðastofnunar 2006 var staðfestur af stjórn stofnunarinnar 23. febrúar 2006. Hagnaður ársins nam 10.103 þús. kr.