Fréttir

Byggðastofnun hefur frá árinu 2015 veitt styrki til meistaranema á háskólastigi sem vinna að lokaverkefnum á sviði byggðaþróunar. Styrkirnir koma af fjárveitingu byggðaáætlunar og eru veittir til verkefna sem hafa skírskotun til markmiða eða aðgerða byggðaáætlunar. Tilgangurinn með verkefninu er að auka vitund og áhuga háskólanema á byggðamálum og byggðaþróun og tengsl við byggðaáætlun hverju sinni.

Á fundi sínum þann 16. febrúar síðast liðinn ákvað stjórn Byggðastofnunar að styrkja 3 verkefni. Verkefnið „Putting the Eggs in Different Baskets: Investigating Potential Additional Applications of Icelandic Lumpfish Roe“ hlaut styrk að fjárhæð kr. 400.000,- Umsækjandi er John Hollis Burrows nemi í haf- og strandsvæðastjórnun við Háskólasetur Vestfjarða. Meginmarkmið verkefnisins er þróun nýrra leiða til að markaðssetja og nýta grásleppuhrogn með það að markmiði að auka fjárhagslegan ávinning af grásleppuveiðum við Ísland. Tekjur af hrognkelsaveiði skipta verulegu máli þegar horft er til tekna sjómanna í fjölmörgum smærri byggðarlögum víðsvegar um land. Afkoma af veiðunum hefur á hinn bóginn verið afar sveiflukennd á milli ára og því eftirsóknarvert að kanna fleiri möguleika á nýtingu og sölu hrogna en nú er raunin.