Fréttir

Byggðastofnun hefur unnið skýrslu fyrir samgöngu- og sveitarstjórnarráðuneytið um vinnu- og skólasóknasvæði og almenningssamgöngur. Um er að ræða bæði almenna greiningu sem og svæðagreiningar þar sem meðal annars eru greindir styrkleikar og veikleikar hvers svæðis ásamt áskorunum með tilliti til almenningssamgangna. Þá eru í skýrslunni sett fram uppfærð kort af vinnu- og skólasóknarsvæðum með hliðsjón af samgöngubótum undanfarinna ára.

Samgöngu- og sveitarstjórnarráðuneytið vinnur að aukinni samhæfingu áætlana í málaflokkum sínum. Hluti af samhæfingunni er að allar áætlanir vinni að sömu framtíðarsýn og vill ráðuneytið skoða hvernig þær geta unnið saman að því að styrkja vinnu- og skólasóknarsvæði og almenningssamgöngur til að skila sterkara samfélagi og auknum atvinnutækifærum. Skýrslan er gott innlegg inn í þá vinnu.

Í skýrslunni kemur fram að samhæfing áherslna í áætlunum ráðuneytisins í tengslum við vinnu- og skólasóknarsvæði séu mikilvæg fyrir byggðaþróun og geta gagnast sem viðmiðunarsvæði þegar þjónusta og innviðauppbygging á sviði hins opinbera er skipulögð. Þá kemur fram að mikilvægt er að auka þekkingu á vinnusókn á Íslandi

Skýrslan hefur þegar komið að góðum notum í vinnu við áætlanir ráðuneytisins, svo sem við gerð grænbókar um samgöngumál og tillögu til þingsályktunar um byggðaáætlun.

Skýrsluna er hægt að nálgast á þessa slóð.