Fréttir

Hátt í 50 manns sóttu íbúafund verkefnisins „Breiðdælingar móta framtíðina“ á Breiðdalsvík mánudaginn 16. nóvember sl. Þar var rætt um framtíðarsýn og markmið og fram komu ýmsar hugmyndir að verkefnum. Mikil jákvæðni og samheldni einkenndi fundinn.  

Á fundinum fór Bjarni Kr. Grímsson verkefnisstjóri yfir drög að markmiðum og framtíðarsýn fyrir sveitarfélagið, sem byggja á skilaboðum íbúafundar frá árinu 2013.  Þrjú meginmarkmið voru til umræðu í vinnuhópum og voru niðurstöður þeirra kynntar í lok fundar. 

Verkefnisstjórn og verkefnisstjóri vinna áfram með niðurstöðurnar og jafnframt gefst íbúum áfram tækifæri til að koma sjónarmiðum sínum á framfæri við Bjarna verkefnisstjóra, netfang bjarni@austurbrú.is eða í síma 4703808.

Eftirfarandi framtíðarsýn var sett fram:

Í Breiðdal ríki stöðuleiki og fjölbreytni í atvinnulífi. Sveitarfélagið sé eftirsótt af ferðamönnum og til búsetu vegna náttúrunnar og það að vera kyrrlát og fögur byggð sem veitir öryggi, vellíðan og góða þjónustu.

Framtíðarsýnin er studd með þremur meginmarkmiðum:

1. Skapa áhugaverðan og spennandi stað sem ástæða er til að sækja heim.
2. Tryggja stoðir sjávarútvegs og landbúnaðar.
3. Vekja  áhuga á og vakta mannlífið og umhverfið.

Undir hverju meginmarkmiði eru nokkur undirmarkmið.  

Í lok fundarins afhenti forstjóri Byggðastofnunar Aðalsteinn Þorsteinsson, styrki úr verkefninu að fjárhæð  7 milljónir króna.  Alls bárust 11 umsóknir, en eftirtaldir níu umsækjendur hlutu styrki:

• Lundasetur Íslands, kr. 500.000,  
• Hið austfirzka bruggfjelag, kr. 500.000,  
• Flygilvinir í Breiðdal, kr. 900.000  
• Menningardagur 2015, kr. 500.000
• Matvælavinnsla beint frá býli, kr. 500.000  
• Breiðdalssetur, kr. 500.000
• Heimasíðugerð Breiðdalshrepps, kr. 500.000  
• Samverustundir á Hótel Bláfelli, kr. 500.000
• Markaðskynning, kr. 2.600.000