Fréttir

Mynd: Bryndís Sigurðardóttir

Verkefnið Öxarfjörður í sókn, Brothættar byggðir í Öxarfjarðarhéraði, úthlutaði styrk í vor að upphæð kr. 200.000,- til íbúa á Kópaskeri til að halda Sólstöðuhátíð. Hátíðin var haldin 22. - 23. júní og var dagskráin stórglæsileg og sólin heiðraði hátíðina með nærveru sinni.

Hátíðin hefur verið haldin á Kópaskeri undanfarin ár. Sótt var um styrk til verkefnisins Öxarfjarðar í sókn til þess að bæta við viðburðum á dagskrá hátíðarinnar frá því sem áður hafði verið. Fastir liðir á hátíðinni eru m.a. kjötsúpukvöld á föstudeginum þar sem valinn hópur íbúa eldar kjötsúpu og síðan er öllum boðið í súpu. Fjallalamb heldur grillkvöld á vægu verði á laugardagskvöldinu ásamt því að boðið er upp á gönguferðir, sýningar og margt fleira sem íbúar sjá um. 

Veittur var styrkur til þess að halda fyrirtækjadag á laugardeginum. Markmiðið var að gefa fyrirtækjum á svæðinu tækifæri til að kynna starfsemi sína og íbúum og gestum tækifæri til að kynnast þeim. Þannig geta heimamenn fræðst betur um sitt næsta nágrenni og burtfluttir sjá meiri tækifæri í því að sækja hátíðina heim. 

Nánar er fjallað um hátíðina á heimasíðu Norðurþings HÉR.