Fréttir

Nú er lokið kynningarferð Evrópuhópsins á þeim samstarfs- og styrkjaáætlunum sem Íslendingar eiga aðgang að í gegnum EES samstarfið.  Evrópuhópurinn er óformlegt samstarf þeirra aðila sem sjá um framkvæmd áætlana ESB hér á landi og hefur hópurinn starfað með hléum í hartnær áratug.

Langt var síðan áætlanirnar höfðu verið kynntar allar á þennan hátt og með tilliti til núverandi árferðis var talin full ástæða til að vekja athygli fólks á þeim tækifærum og styrkjum sem bjóðast í Evrópusamstarfi.  Í stuttu máli sagt fór aðsókn að kynningunum fram úr björtustu vonum hópsins en alls sóttu um 250 manns kynningarnar fyrir utan kynninguna á Háskólatorgi 15. janúar sem var einnig vel sótt.

Í tengslum við kynningarnar var vefsíðan evropusamvinna.is endurbætt og kynnt. En henni er ætlað að vera gátt þar sem fólk getur fengið helstu upplýsingar um allar áætlanir sem tengjast Evrópuhópnum og fundið leiðir að nánari upplýsingum.

Kynningar voru skipulagðar í samstarfi við vaxtarsamninga, atvinnuþróunarfélög, Samband íslenskra sveitarfélaga  og landshlutasamtök sveitarfélaga. Fyrir hönd Evrópuhópsins sáu þau Aðalheiður Jónsdóttir frá Rannís/7.rá og Þórarinn Sólmundarson frá Byggðastofnun/NPP um skipulag verkefnisins.

Þeir 10 staðir sem voru heimsóttir voru Egilsstaðir, Höfn, Vík, Selfoss, Vestmannaeyjar, Reykjanesbær, Ísafjörður, Sauðárkrókur, Akureyri og Húsavík.

Eftirtaldar áætlanir tilheyra Evrópuhópnum og voru kynntar:

• Menntaáætlun
• • Comenius
  • Leonardó
  • Erasmus
  • Grundtvig
  • aðrar hliðaraðgerðir LLP
• 7. rannsóknaáætlun ESB
• COST rannsóknasamstarf
• Evrópa unga fólksins
• Norðurslóðaáætlun ESB
• EURES – EES vinnumiðlun
• Nýsköpunar- og samkeppnisáætlun - CIP
• PROGRESS jafnréttis- og vinnumál
• Menningaráætlunin
• Kvikmyndaáætlunin MEDIA
• Almannavarnaáætlun
• Norður-Atlantsnefndin NORA