Fréttir

Í tilefni af fréttaflutningi um Aflamark Byggðastofnunar í Grímsey vill stofnunin taka eftirfarandi fram:

Undanfarin ár hefur Aflamarki Byggðastofnunar í Grímsey verið úthlutað eftir reglugerð sem sett var árið 2015 og byggði á undanþágu útgerðaraðila í eynni frá vinnsluskyldu sem er almenna reglan í Aflamarki Byggðastofnunar. Sú reglugerð var numin úr gildi með reglugerð nr.973/2019 af þáverandi sjávarútvegs- og landbúnaðarráðherra. Samningar sem gerðir voru á grundvelli þeirrar reglugerðar runnu út þann 31. ágúst sl.

Aflamark Byggðastofnunar byggir nú á reglugerð nr.643/2016 og samkvæmt 7. gr. hennar er vinnsluskylda á úthlutuðu aflamarki. Ekki er að finna ákvæði í reglugerðinni sem heimilar Byggðastofnun að veita undanþágu frá þeirri skyldu og Byggðastofnun hefur ekki umboð til að breyta þeim reglum sem um aflamarkið gilda.

Síðastliðið vor var auglýst eftir umsóknum um Aflamark Byggðastofnunar til næstu sex fiskveiðiára. Vegna Grímseyjar bárust sex umsóknir. Samtal hefur verið við umsækjendur vegna þeirra og fundað með þeim í sumar út í Grímsey með það fyrir augum að hvetja umsækjendur til samstarfs um nýtingu aflamarksins til að hámarka byggðaáhrif. Umsóknir hafa ekki verið afgreiddar en umsækjendum gefinn kostur á að vinna áfram að því að reyna að koma á samstarfi um vinnslu í eynni.