Fréttir

Breyting á fasteignamati 2010-2014

Fasteignamat íbúðarhúsnæðis hefur hækkað mjög mis mikið í prósentum á milli áranna 2010 og 2014 eftir einstökum þéttbýlisstöðum. Mest hefur hækkun matsins í prósentum verið í Vestmannaeyjum 70,6% og næst mest á Höfn í Hornafirði og á Siglufirði 64,1%. Þetta eru einu staðirnir þar sem hækkunin er yfir 50%. Hólmavík liggur þó nærri með 48,7% hækkun en engir aðrir staðir ná 40% hækkun.

Á fjórum stöðum lækkar fasteignamatið á milli áranna 2010 og 2014. Í Borgarnesi um 6,3%, í Keflavík um 5%, á Selfossi um 1,3% og í Hveragerði um 0,7%.

Hækkun heildar fasteignagjalda á milli áranna 2010 og 2014 er almennt meiri en hækkun matsins. Það er aðeins á þrem stöðum, á Höfn í Hornafirði, í Stykkishólmi og á Dalvík sem hækkun gjaldanna er minni en hækkun fasteignamatsins.

Mest er hækkun fasteignagjaldanna á milli áranna 2010 og 2014 á Siglufirði 82,3%, Hólmavík 79,3% og í Vestmannaeyjum 72,6%. Þrátt fyrir það eru fasteignagjöldin á þessum stöðum langt frá því hæsta sem gerist.

Á tveim stöðum hafa fasteignagjöldin lækkað á milli áranna 2010 og 2014. Í Keflavík um 0,3% og á Selfossi um 0,2%.

Í framangreindum samanburði er verið að bera saman fasteignamat og fasteignagjöld á þeirri fasteign sem notuð hefur verið sem viðmið á undanförnum árum, einbýlishús sem er 161,1m² að grunnfleti og lóðarstærð 808m²

Hér að neðan má sjá töflur og súlurit sem sýna breytingarnar.

Breyting á fasteignamati 2010-2014 (súlurit) (tafla)

Breyting á fasteignagjöldum 2010-2014 (súlurit) (tafla)

Nánari upplýsingar veitir Snorri Björn Sigurðsson, forstöðumaður þróunarsviðs í síma 455 5400 eða snorri@byggdastofnun.is