Fréttir

Byggðastofnun leiðir tveggja ára evrópskt ERASMUS+ samstarfsverkefni, INTERFACE, í samstarfi við Háskólann á Bifröst auk erlendra þátttakenda frá Búlgaríu, Grikklandi, Írlandi og Ítalíu. INTERFACE stendur fyrir Innovation and Entrepreneurship for Fragile Communities in Europe, sem þýða mætti sem Nýsköpun og frumkvöðlastarf í brothættum byggðarlögum í Evrópu. Auk þess að þiggja mótframlög frá þátttökuaðilum verkefnisins er það fjármagnað með €247.000 styrk frá Erasmus+ styrkjaáætlun ESB. Meginmarkmið verkefnisins er að þróa þjálfunar- og kennsluefni fyrir íbúa sem vilja vinna að samfélagsþróun og uppbyggingu byggðarlaga sem eiga undir högg að sækja, meðal annars sökum fólksfækkunar og fábreyttra atvinnutækifæra. Verkefnið er einnig mikilvægur vettvangur fyrir lærdóm og miðlun reynslu annarra þjóða enda eru viðfangsefnin sambærileg í löndunum allt í kringum okkur.

INTERFACE verkefnið byggir á þarfagreiningu sem unnin er innan þátttökusvæðanna sem valin hafa verið í hverju landi. Þjálfun íbúa byggir einnig að hluta á aðferðum markþjálfunar. Íbúar öðlast færni til að vinna með og virkja aðra íbúa samfélags til framþróunar þess og munu þeir einnig skipuleggja vinnustofur þar sem unnið er að atvinnu- og samfélagsþróun.

Nú hafa þrjár námslotur verið haldnar í verkefninu og hafa þær verið vel sóttar. Fyrsta námslotan var haldin þann 29. ágúst á Borgarfirði eystri og var þá farið yfir þátttöku almennings, ákvarðanatökuferlið, fundarform og árangursmat. Önnur námslotan var þann 11. október í Hrísey og var þá farið yfir aðferðir markþjálfunar. Þriðja námslotan var þann 15. nóvember á Þingeyri og var þá haldið áfram að kynna og ræða aðferðir markþjálfunar auk samfélagsþróunar. Þá fóru gestgjafarnir á Þingeyri með hópinn í skoðunarferð og kynntu meðal annars aðsetur listamanna og starfsemi Blábankans.