Fréttir

Frá íbúaþingi í Árneshreppi

Á fundi sínum í liðinni viku samþykkti stjórn Byggðastofnunar tillögu um þrjú ný byggðarlög í Brothættum byggðum. Það eru Árneshreppur, Borgarfjörður eystri og Þingeyri.

Alls hafa sjö byggðarlög tekið þátt í Brothættum byggðum, en verkefninu Bíldudalur – samtal um framtíðina sem var með frá árinu 2013 lauk formlega í ársbyrjun. Þó er enn verið að vinna að verkefnum sem hlutu styrki úr sjóði Brothættra byggða. Þá lýkur verkefninu Raufarhöfn og framtíðin nú í árslok. Af þessum sökum var ákveðið að bæta við ofangreindum byggðarlögum.

Áfram verður unnið að verkefnunum Breiðdælingar móta framtíðina, Skaftárhreppur til framtíðar, Glæðum Grímsey, Hrísey, perla Eyjafjarðar og Öxarfjörður í sókn.

Næstu skref verða væntanlega þau að setja á fót verkefnisstjórnir fyrir þessi þrjú nýju byggðarlög í samstarfi við heimafólk. Að verkefnunum standa Byggðastofnun, viðkomandi sveitarfélög, landshlutasamtök og/eða atvinnuþróunarfélög og íbúar eiga tvo fulltrúa í hverri verkefnisstjórn.

Þegar hefur verið haldið íbúaþing í Árneshreppi og verður niðurstaða þess grunnurinn að frekari stefnumótun fyrir verkefnið. Þegar myndaðar hafa verið verkefnisstjórnir í verkefnin í Borgarfirði eystri og Þingeyri verður tekið að undirbúa íbúaþing fyrir þau byggðarlög.