Fréttir

Könnun var lögð fyrir styrkþega í Brothættum byggðum sem hlotið höfðu styrki úr frumkvæðissjóðum þátttökubyggðarlaga á árunum 2020-2023, í þeim tilgangi að kanna hug þeirra til styrkveitinga til frumkvæðisverkefna og verkefnisins í heild.

Könnunin var framkvæmd og send á öll þekkt netföng styrkþega í virkum þátttökubyggðarlögum á tímabilinu desember 2023 – janúar 2024. Alls voru þetta 174 netföng tengd styrkhöfum í sjö byggðarlögum. Í sumum tilvikum er sama netfangið tengt fleiri en einum styrk og það var lagt í hendur styrkþega að ákveða hvort hann/hún tók þátt í könnuninni fyrir eitt styrkt verkefni eða fleiri.

Þátttaka var góð og 102 svör bárust úr sjö byggðarlögum og heildar svarhlutfall því 59%. Niðurstöðurnar eru um margt áhugaverðar. Það sem einkennir svörin er þakklæti og ítrekun á mikilvægi stuðnings við íbúa brothættra byggða við að efla frumkvæði og þátttöku. Þetta á við gerð verkefnisáætlana, veitta styrki, stuðning frá verkefnisstjórum og verkefnið í heild. Meðal annars kemur fram hjá mörgum þátttakendum að stuðningurinn og viðurkenning á hugmyndum og hvatning sem í því felst er þeim mjög mikilvæg, jafnvel þó ekki sé um háar upphæðir að ræða í mörgum tilvikum. Þó bendir hluti styrkþega einnig á þörf á að lengja verkefni Brothættra byggða í hverju byggðarlagi og/eða hafa meira fé til ráðstöfunar til að styrkja frumkvæðisverkefni.

Eins og við má búast eru skiptar skoðanir og af svörum má sjá að í stöku tilvikum virðist styrkjaferlið ekki hafa höfðað til styrkþega og/eða þeir ósáttir við gang mála.

Sjón er sögu ríkari og það er hægt að nálgast kynningu á niðurstöðunum hér.

Hér fyrir neðan má sjá skjáskot úr niðurstöðuskjalinu.

Nánari upplýsingar veita Helga Harðardóttir og Kristján Þ. Halldórsson hjá Byggðastofnun.