Fréttir

Stjórn Byggðastofnunar ákvað á fundi sínum þann 21. janúar s.l. að styrkja fjóra meistaranema sem vinna að lokaverkefnum á sviði byggðamála. Heildarupphæð styrkjanna er ein milljón króna. Viðfangsefnin að þessu sinni snúast um tengsl fólks við heimabyggð sína og hvaða máli þau skipta varðandi náttúruvá, um seiglu samfélaga (resilience) og styrkjaumhverfi, um störf menningarfulltrúa og um sóknaráætlanir landshluta. Auglýsing um styrkina birtist í október 2021 og umsóknarfrestur rann út 2. nóvember. Alls bárust níu umsóknir.  Styrkirnir eru fjármagnaðir af byggðaáætlun og skulu verkefnin sem sótt er um styrk til hafa skírskotun til markmiða eða aðgerða byggðaáætlunar.

Verkefnin sem styrk hljóta eru: 

How does place attachment relate to perceptions of climate change-related hazards? A case study in Patreksfjörður. Styrkþegi Frances Eleanor Simmons, Háskólasetur Vestfjarða. Hvaða máli skipta tilfinningatengsl fólks við tiltekna staði þegar náttúruvá er annars vegar? Patreksfjörður verður skoðaður sérstaklega (case-study). Loftslagsbreytingar eru áhrifaþáttur varðandi náttúruvá. Í rannsókninni er einnig unnið út frá hugmynd um seiglu samfélaga (resilience).

Unconditional Basic Income as a Means to Foster Innovation in Iceland. Styrkþegi Tyler James Wacker, Háskólasetur Vestfjarða. Skoðað verður hvernig styrkjaumhverfið á Íslandi hefur aukið seiglu (resilience) samfélaga í jaðarbyggðum og eflt nýsköpun og þá sérstaklega í skapandi greinum.

Tilviksrannsókn á starfi menningarfulltrúa sveitarfélaga á Íslandi. Styrkþegi Herdís Ýr Hreinsdóttir, Háskóla Íslands. Skoðuð verða störf menningarfulltrúa, hvernig staðið er að ráðningu þeirra, hver eru hlutverk þeirra og verkefni, hvar þeir eru starfandi og hvort viðfangsefnin eru ólík eftir sveitarfélögum.

Sóknaráætlanir landshluta – markmið og ávinningur. Styrkþegi Unnur Valborg Hilmarsdóttir, Háskóla Íslands. Markmið, hugmyndafræði og framkvæmd sóknaráætlana eru til skoðunar í þessu verkefni þar sem metin verður staða sóknaráætlana og velt fyrir sér hvernig þær gegna best tilgangi sínum til framtíðar.

Hver styrkur er að fjárhæð 250.000 krónur.

Byggðastofnun óskar styrkþegum til hamingju!