Fréttir

Í dag, föstudaginn 23. maí 2014, var haldinn stofnfundur Rannsóknastöðvarinnar Rifs, sem er sjálfseignarstofnun sem staðsett verður á Raufarhöfn.  Stofnaðilar eru Byggðastofnun, Norðurþing og Náttúrustofa Norðausturlands.

Í tengslum við átaksverkefni Byggðastofnunar á Raufarhöfn, Brothættar byggðir, hefur síðasta árið verið unnið að stofnun rannsóknastöðvar á Raufarhöfn, með það að markmiði að nýta sérstöðu Melrakkasléttu til rannsókna og styrkja um leið byggð og innviði samfélagsins. Rannsóknastöðinni er ætlað að efla rannsóknastarf á Melrakkasléttu, m.a. með því að laða að bæði innlenda og erlenda vísindamenn til dvalar í stöðinni og rannsókna á svæðinu. Náttúrufar og saga Melrakkasléttu býður upp á mikla möguleika í rannsóknum á vistkerfi norðurslóða og áhrifum loftslagsbreytinga, bæði beint og óbeint. Þá bjóða innviðir Raufarhafnar upp á góða aðstöðu fyrir stöðina. Í upphafi mun rannsóknastöðin til húsa í gistiheimilinu Hreiðrinu og hentar það einkar vel fyrir unga stofnun að klekjast út í rúmgóðu og notalegu Hreiðrinu. Stjórn rannsóknastöðvarinnar verður skipuð fulltrúum rannsóknastofnana og háskóla, ásamt fulltrúa sveitarfélagsins Norðurþings. Nafn rannsóknastöðvarinnar vísar til eyðibýlisins Rifs, sem stendur á nyrsta tanga á Melrakkasléttu, Rifstanga, sem jafnframt er nyrsti hluti Íslands.

Verkefnið hefur hlotið styrki frá Vaxtarsamningi Norðausturlands, Byggðastofnun, Styrktarsjóði Eignarhaldsfélags Brunabótafélags Íslands (EBÍ) og notið stuðnings Norðurþings.  Auk þess hefur starfsemin fengið úthlutað fé á fjárlögum fyrir árið 2014.