Fréttir

Stýrihópur stjórnarráðsins og fulltrúar SSA

Síðastliðinn mánudag heimsóttu fulltrúar átta ráðuneyta, auk fulltrúa frá Sambandi íslenskra sveitarfélaga og Byggðastofnun, starfsstöð Austurbrúar og SSA í Múlanum í Neskaupstað.

Tilefnið var árlegur fundur stýrihóps Stjórnarráðsins um byggðamál og SSA um sóknaráætlun Austurlands. Af hálfu Stjórnarráðsins voru mættir fulltrúa samgöngu- og sveitarstjórnar-, atvinnuvega- og nýsköpunar-, mennta- og menningarmála-, umhverfis-, dómsmála-, félagsmála-, heilbrigðismála- og forsætisráðuneyta, auk fulltrúa Sambandsins. Fulltrúi Byggðastofnunar er jafnframt verkefnisstjóri sóknaráætlana landshluta. Þrír yfirverkefnastjórar Austurbrúar auk framkvæmdastjórans, formanns og varaformanns SSA tóku á móti gestunum að sunnan.

Á fundinum um Sóknaráætlun Austurlands bar margt á góma, m.a. hvernig gengur fyrir aðila utan höfuðborgarsvæðisins að sækja um opinbera styrki, ekki síst hjá Rannís, rætt var um reiknireglu sóknaráætlana og kynnt vinna við svæðisskipulag Austurlands. Einnig voru kynnt nokkur af áhersluverkefnum Sóknaráætlunar Austurlands auk þess sem farið var yfir Sóknaráætlun Austurlands og vinnulag við Uppbyggingarsjóð Austurlands.

Fundurinn var haldinn í Múlanum í Neskaupstað, en það nýuppgerða og að hluta til nýja glæsilega hús hýsir margvíslega starfsemi, meðal annars eina af starfstöðvum Austurbrúar. Fundargestum var kynnt starfsemi Náttúrustofu Austurlands og alþjóðlega fyrirtækisins Nox Health en það eru dæmi um þá starfsemi sem Múlinn hýsir. Loks heimsótti hópurinn fyrirtækið Tandrabretti ehf. í Neskaupstað og fræddist um starfsemi þess.