Fréttir

Út er komin skýrsla starfshóps um stöðu og möguleika lífrænnar framleiðslu á Íslandi. Lífrænar aðferðir eru í mikilli sókn víða um heim í framleiðslu matvæla, snyrtivara, vefnaðarvara og hvers konar náttúruafurða. Stjórnvöld flestra Evrópuríkja vinna markvisst að því að hagnýta slíkar aðferðir til sóknar í byggða- og umhverfismálum. Þessi þróun hefur að mestu farið framhjá Íslendingum.

Út er komin skýrsla starfshóps um stöðu og möguleika lífrænnar framleiðslu á Íslandi.
Lífrænar aðferðir eru í mikilli sókn víða um heim í framleiðslu matvæla, snyrtivara, vefnaðarvara og hvers konar náttúruafurða. Stjórnvöld flestra Evrópuríkja vinna markvisst að því að hagnýta slíkar aðferðir til sóknar í byggða- og umhverfismálum. Þessi þróun hefur að mestu farið framhjá Íslendingum.

Skýrslan, sem ber nafnið ”Lífræn framleiðsla – Ónotað tækifæri í atvinnulífi landsbyggðarinnar”, gerir úttekt á stöðu lífrænnar framleiðslu hérlendis í samanburði við grannþjóðir okkar í Vestur - Evrópu, lýsir helstu hindrunum og hvötum sem eru á vegi lífrænnar þróunar, kortleggur þær greinar atvinnulífs sem geta hagnýtt sér lífrænar aðferðir, og gerir tillögur um ráðstafanir sem gera þurfi til að skapa slíkri nýsköpun frjórra umhverfi, einkum af hálfu ríkis og sveitarfélaga.

Til marks um stöðu lífrænnar framleiðslu hér á landi er hlutfall vottaðs lífræns nytjalands einungis 0,3%. Þetta hlutfall er 4% í löndum ESB og á bilinu 6-15% í þeim löndum sem lengst eru komin. Nokkur hundruð norrænna bænda stunda lífræna ræktun mun norðar á hnettinum en Ísland þar sem einungis 25 býli er skráð með vottun. Norsk stjórnvöld vinna eftir framkvæmdaáætlun um aukna lífræna framleiðslu og hafa sett markið á 15% árið 2015.

Evrópusambandið og einstök ríki Evrópu hafa um nokkurt skeið stutt ríkulega upptöku lífrænna aðferða, m.a. sem þátt í byggðastefnu. Stjórnvöld horfa til lífrænnar þróunar sem leið til að uppfylla fjölþjóðlegar skuldbindingar um sjálfbæra þróun og líffræðilega fjölbreytni. Opinber stuðningur við lífræna aðlögun er liður í markvissari hagnýtingu fjármuna til sjálfbærrar atvinnuþróunar í stað framleiðslutengdra styrkja.

Skýrslan bendir á nauðsyn þess að Ísland leiti inn á sömu braut. Hún rekur styrkleika í íslensku umhverfi, markaðsaðstæðum og viðhorfum sem hagnýta beri í því skyni, svo sem frábæran árangur nokkurra bænda og fyrirtækja í ræktun, úrvinnslu og markaðssetningu; dæmi um jákvæð áhrif lífrænnar vottunar á útflutningsmöguleika; gríðarlega aukningu eftirspurnar; traust vottunarkerfi á alþjóðlegum grunni; og jákvæð viðhorf almennings og stjórnmálamanna til lífrænnar framleiðslu.

Hér má lesa skýrsluna - smella