Fréttir

Átján verkefni hlutu styrki úr Frumkvæðissjóði Sterkra Stranda í ár á sérstakri úthlutunarhátíð sem haldin var á Café Riis á Hólmavík þann 18. apríl sl. Styrkirnir námu samtals kr. 23.500.000 og voru verkefnin sem hlutu brautargengi fjölbreytt og snerta ýmsa þætti samfélagsins.  

Aldrei hafa fleiri umsóknir borist, alls 33 og heildarfjárhæð styrkumsókna tæpar 90 milljónir króna. Byggðastofnun veitti sjö milljón króna viðbótarframlag í sjóðinn í ár í þeim tilgangi að bæta íbúum Strandabyggðar upp hversu lág úthlutunin var fyrstu tvö árin ef horft er til fjölda íbúa. 

Verkefnið Sterkar Strandir er nú í lokaáfanga í Brothættum byggðum en Byggðastofnun mun draga sig í hlé úr verkefninu um næstu áramót eftir að hafa framlengt það um eitt ár, út árið 2024. Hér er því um að ræða síðustu úthlutun úr sjóðnum. Vegna fjölda umsókna sem bárust í Frumkvæðissjóðinn í ár má draga þá ályktun að frumkvæði íbúa sé mikið og hugur í fólki að drífa verkefni áfram og byggja upp samfélagið.

Stjórnendur Byggðastofnunar áttu þess kost að taka þátt í úthlutunarhátíðinni að þessu sinni og þótti ánægjulegt að hitta styrkþega og heyra um gróskuna sem einkennir þau verkefni sem hlutu styrki. Raunar hefðu fjölmörg þeirra verkefna sem ekki var unnt að styrkja einnig sómt sér vel á listanum.

Starfsfólk Byggðastofnunar óskar styrkþegum innilega til hamingju með styrkveitinguna og umsækjendum öllum velfarnaðar í allri viðleitni þeirra við uppbyggingu samfélagsins í Strandabyggð.

Hér má sjá myndir sem teknar voru á úthlutunarhátíðinni.