Fréttir

Einar Örn, Sigríður Elín og Arnar Már

Byggðastofnun hefur gert fimm ára samning við Einar Örn Hreinsson um gerð mannfjöldaspár fyrir stofnunina.

Einar Örn starfaði hjá Byggðastofnun á árunum 2013-2019 og meðal verka hans þá var gerð mannfjöldalíkans sem mannfjöldaspá byggir á. Hann þekkir því vel til verksins.

Byggðastofnun hefur í þrígang frá árinu 2018 gefið út mannfjöldaspár minni svæða og er notagildi þeirra óumdeilt. Þær geta reynst mikilvægt verkfæri til að bregðast við mögulegri þróun mannfjölda tiltekinna svæða eða sveitarfélaga sem annars væri ófyrirséð.

Mannfjöldaspá minni svæða hefur þannig reynst stjórnvöldum, sveitarfélögum, stofnunum og fyrirtækjum gagnleg við áætlanagerð og gefið hagaðilum aukið svigrúm til að bregðast við líklegum breytingum. Sú breyting verður að í stað þess að gefa út mannfjöldaspá annað hvert ár mun Byggðastofnun gefa spána út árlega, frá og með árinu 2024.