Fréttir

Heildarmat

Byggðastofnun hefur fengið Þjóðskrá Íslands til að reikna út fasteignamat og fasteignagjöld á sömu viðmiðunarfasteigninni á nokkrum þéttbýlisstöðum á landinu líkt og undanfarin ár. Viðmiðunareignin er ávalt sú sama, einbýlishús sem er 161,1 m² að grunnfleti og lóðarstærð er 808m². Þessi viðmiðunareign er í raun ekki til staðar á þeim stöðum sem skoðaðir eru. Fasteignamat og lóðarleiga eru reiknuð út frá stærðum fasteignar og lóðar. Með sömu viðmiðunareigninni á öllum stöðum er því aðeins er verið að gera mat og gjöld samanburðarhæf.

Fasteignagjöldin eru reiknuð út samkvæmt núgildandi fasteignamati sem gildir frá 31. desember 2016 og samkvæmt álagningarreglum ársins 2017 eins og þær eru í hverju sveitarfélagi. Til að forðast skekkjur var útreikningur fasteignagjaldanna sendur á viðkomandi sveitarfélag og óskað eftir að athugasemdir yrðu gerðar ef um skekkjur væri að ræða. Tekið hefur verið tillit til þeirra ábendinga sem bárust.

Heildarmat, sem er samanlagt verðmat fasteignar og lóðar, er mjög mismunandi eftir því hvar á landinu er. Heildarmat á viðmiðunarsvæðum í höfuðborginni er frá 30 milljónum upp í 66 milljónir og hefur hækkað um 3 – 11% á milli ára.

Af þeim þéttbýlisstöðum sem skoðaðir voru, utan höfuðborgarsvæðisins, er matið hæst á Akureyri 37,5 milljónir, var 35,4 milljónir árið áður. Lægsta heildarmat undanfarin ár hefur verið til skiptis á Patreksfirði og Vopnafirði. Heildarmatið á þessum tveimur stöðum hækkaði hlutfallslega mest allra staða á milli áranna 2016 - 2017. Matið á Vopnafirði er nú 15,2 milljónir en var 12,0 milljónir og á Patreksfirði er það nú 14,5 milljónir en var 11,7 milljónir. Er Bolungarvík nú með lægsta heildarmatið, 65 þúsund krónum lægra en er á Patreksfirði.

Nánari greiningu má sjá í skýrslunni Samanburður fasteignagjalda 2017.