Fréttir

Fasteignagjöld 2015

Byggðastofnun hefur fengið Þjóðskrá Íslands til að reikna út fasteignamat og fasteignagjöld á sömu fasteigninni á nokkrum þéttbýlisstöðum á landinu eins og undanfarin ár. Viðmiðunareignin er einbýlishús sem er 161,1 m² að grunnfleti og lóðarstærð er 808m².

Gjöldin eru reiknuð út samkvæmt núgildandi fasteignamati sem gildir frá 31. desember 2014 og samkvæmt álagningarreglum ársins 2015 eins og þær eru í hverju sveitarfélagi. Til að forðast skekkjur var útreikningur fasteignagjaldanna sendur á viðkomandi sveitarfélag og óskað eftir að athugasemdir yrðu gerðar ef um skekkjur væri að ræða. Tekið hefur verið tillit til þeirra ábendinga sem bárust.

Fasteignamat er mjög mismunandi eftir því hvar á landinu er. Fasteignamat húss og lóðar á höfuðborgarsvæðinu, miðað við meðaltal, er 40,1 milljón og hefur hækkað úr 38,2 milljónum frá árinu áður.

Af þeim þéttbýlisstöðum sem skoðaðir voru utan höfuðborgarsvæðisins er matið hæst á Akureyri 33,6 milljónir, var 31,7 milljónir árið áður. Lægsta heildarmat undanfarin ár hefur verið á Patreksfirði og Vopnafjörður hefur verið með það næst lægsta. Nú hefur það snúist við. Matið á Vopnafirði er 11,1 milljón og á Patreksfirði 11,4 milljónir. 

Mest hefur fasteignamatið hækkað milli ára á Hólmavík, um 12,6% og í Borgarnesi um 11,8%. Það lækkar hins vegar um 4,8% í Grundarfirði og um 4,7% á Ísafirði.

Þegar horft er á fasteignagjöldin breytist myndin verulega eins og undanfarin ár. Tekið skal fram að hér er horft til allra svokallaðra fasteignagjalda, það er fasteignaskatts, lóðarleigu, fráveitugjalds, vatnsgjalds og sorpgjalda. Meðaltalið á höfuðborgarsvæðinu gefur ekki hæstu fasteignagjöldin. Því valda álagningarreglur einstakara sveitarfélaga. 

Gjöldin eru nú hæst á Húsavík, 329 þúsund, næsthæst á Grundarfirði 319 þúsund og þriðju hæst í Stykkishólmi 318 þúsund. Á síðasta ári voru gjöldin upp á 319 þúsund hæst á Grundarfirði. Lægstu gjöldin líkt og í fyrra eru á Vopnafirði 167 þúsund en voru 164 þúsund.

Gjöldin á Vopnafirði í ár eru 51% af gjöldunum á Húsavík og er það svipaður munur á hæstu og lægstu gjöldum frá fyrra ári.

Mesta hækkun fasteignagjalda á milli áranna 2014 og 2015 er 23% eða 59 þúsund í Borgarnesi. Mest lækka gjöldin á Siglufirði um 7,7% eða 18 þúsund.

Rétt er að taka fram að sveitarfélög veita mismunandi þjónustu til dæmis hvað varðar sorpurðun og förgun og er sums staðar rukkað fyrir þjónustu sem er innifalin í gjöldum annars staðar. Þá er og rétt að vekja athygli á því að á einstaka stað er fasteignamat mismunandi eftir hverfum á framangreindum stöðum. Loks er ástæða til að vekja athygli á því að í sveitarfélögum með fleiri en einn þéttbýliskjarna er fasteignamatið mjög mishátt eftir kjörnum og þar með fasteignagjöldin. Sama á við um dreifbýli. Fyrir kemur að mismunandi reglum er beitt við útreikning lóðarleigu innan sama þéttbýlis, til dæmis vegna þess að eldri samningar kveða á um aðrar reikniaðferðir. Hér er miðað við nýjustu samninga.

Hér má finna töflur og myndir.