Fréttir

Sigríður Sigurðardóttir

Árið 2019 veitti Byggðarannsóknasjóður styrk til rannsóknar á torfbyggingum og viðhorfum til þeirra á vegum Háskólans á Hólum. Nú eru komnar út þrjár skýrslur um rannsóknina.

Torfbyggingar eru sérstæður og mikilvægur byggingararfur á heimsvísu og hafa vakið áhuga erlendra gesta landsins. Ferðaþjónusta er mikilvæg atvinnugrein og ferðamenn hafa áhrif á efnahag, menningu, náttúru og ímynd landsins, sem og á sjónarmið fólks til verndunar og nýtingar menningar- og náttúruminja. Kominn var tími til að kanna hug fólks til þessa rammíslenska menningararfs og hvort möguleikar væru til að tengja hann betur en gert er við ferðaþjónustu. Í rannsókninni, sem bæði var unnin út frá spurningum á vettvangi og með rafrænum hætti, var kannað hvernig fólk metur torfbyggingar (e. vernacular buildings) í nútímanum. Leitað var til erlendra og innlendra gesta torfbæja og til landsmanna sem þekkja torfbyggingar af eigin raun.

Markmið með rannsókninni var að leiða í ljós hvaða sess torfhús hafa í fræðslu, ferðaþjónustu og í minjavernd og hver vilji Íslendinga er til að vernda þau og hvaða tilgangi þau ættu að þjóna í framtíðinni. Rannsóknin var unnin í samstarfi Ferðamáladeildar Háskólans á Hólum, Minjastofnunar Íslands, Þjóðminjasafns Íslands, Byggðasafns Skagfirðinga, Menningarmiðstöðvar Þingeyinga og Rannsóknarmiðstöðvar ferðamála. Sigríður Sigurðardóttir, aðjúnkt við Ferðamáladeild Háskólans á Hólum, stýrði rannsókninni.

Rannsóknarskýrslurnar eru:
I Viðhorf til nytja- og minjagildis torfbygginga
II Torfbyggingar í ferðaþjónustu, viðhorf og hugmyndir
III Gestir meta torfbæi

Skýrsluhöfundur er Sigríður Sigurðardóttir, 2020.