Fréttir

Miðvikudaginn 29. apríl var haldinn rafrænn fundur fyrir íbúa Strandabyggðar í verkefninu Brothættar byggðir. Tilefni fundarins var að kynna styrkjamöguleika í fjárfestingarátaki í Brothættum byggðum. Sem hluti af aðgerðum vegna veirufaraldurs samþykkti Alþingi að veita aukalega 100 m.kr. til Brothættra byggða á árinu 2020. Þar af fara 60 m.kr. í Frumkvæðissjóð sem skiptist jafnt á milli þátttökubyggðarlaganna, 8,5 m.kr. á hvert þeirra. Verkefnisstjórn hvers byggðarlags úthlutar úr þeim sjóði og stefnt er að úthlutun í Strandabyggð að afloknu íbúaþingi sem haldið verður í félagsheimilinu í Strandabyggð í sumar og mótun verkefnisáætlunar í framhaldi af því.

40 m.kr. er veitt Öndvegissjóð sem er sameiginlegur samkeppnissjóður fyrir öll sjö byggðarlögin. Hvert byggðarlag getur sent að hámarki tvær umsóknir í Öndvegissjóðinn. Sérstök úthlutunarnefnd, skipuð fulltrúum verkefnisstjórna Brothættra byggða, úthlutar úr sjóðnum. Úthlutanir úr Öndvegissjóði eru ætlaðar til þess að styðja við stærri frumkvæðisverkefni íbúa sem skapa atvinnu í byggðarlaginu auk þess að taka tillit til markmiða verkefnisins Brothættar byggðir.

Hægt er að sjá upptöku af fundinum á heimasíðu Strandabyggðar og glærur fundarins má nálagst HÉR.

Verkefnisstjórn Brothættra byggða í Strandabyggð kallar nú eftir hugmyndum úr samfélaginu að verkefnum til að sækja um í Öndvegissjóðinn. Senda má hugmyndir inn HÉR og er frestur til að skila inn hugmyndum til og með 10. maí 2020. Verkefnisstjórnin vill hvetja samfélagið til að senda inn hugmyndir að verkefnum.