Fréttir

Á miðvikudaginn í síðustu viku voru fulltrúar Byggðastofnunar viðstaddir prufukeyrslu á vélum nýrrar Kalkþörungaverksmiðju á Bíldudal, en Byggðastofnun hefur annast innlenda lánsfjármögnun verkefnisins.  Uppsetning verksmiðjunnar hefur gengið að óskum og er verkið á áætlun. 

28.2.2007

Á miðvikudaginn í síðustu viku voru fulltrúar Byggðastofnunar viðstaddir prufukeyrslu á vélum nýrrar Kalkþörungaverksmiðju á Bíldudal, en Byggðastofnun hefur annast innlenda lánsfjármögnun verkefnisins.  Uppsetning verksmiðjunnar hefur gengið að óskum og er verkið á áætlun. 

Komið hefur í ljós að hráefnið sem notað verður til vinnslunnar er af mjög háum gæðum, bæði til framleiðslu dýrafóðurs, og til matvælaframleiðslu. Reiknað er með að afkastageta verksmiðjunnar verði um 57.000 tonn á ári en gert er ráð fyrir að í fyrsta áfanga verði hún um 8.000 tonn á ári og verði aukin í fulla getu í nokkrum áföngum.  Fyrri hluti verksmiðjunnar verður tilbúinn  innan nokkurra daga, en seinni hlutinn eftir u.þ.b. 8 vikur. 

Vonir standa til þess að með verksmiðjunni skapist tíu til fimmtán framtíðarstörf á Bíldudal.  Kalkþörungaverksmiðjan á Bíldudal er fyrsta fyrirtæki sinnar tegundar á Íslandi.

Íslenska kalkþörungafélagið er aðaleigandi verksmiðjunnar, en það er svo aftur í 75% eigu Celtic Sea Minerals á Írlandi. Írska fyrirtækið á einnig kalkþörungaverksmiðju í bænum Castletownbere á Írlandi, en sú verksmiðja framleiðir einkum hráefni í dýrafóður.  Þriðja verksmiðjan er svo í Birmingham á Englandi en hún framleiðir hráefni til matvælaiðnaðar.  Gert er ráð fyrir að megnið af afurðum verksmiðjunnar verði seldar úr landi.  

Þetta verkefni er dæmi um glæsilegan vaxtasprota í nýsköpun atvinnulífs á Bíldudal.