Fréttir

Grímsey

Nýverið samþykkti stjórn Byggðastofnunar á fundi sínum að taka þrjú byggðarlög inn í verkefnið um framtíð brothættra byggða. Þau byggðarlög eru annars vegar Kópasker og nágrenni, sem tilheyrir Norðurþingi, hins vegar eyjarnar Grímsey og Hrísey sem tilheyra Akureyrarkaupstað.

Vorið 2014 var auglýst eftir umsóknum um þátttöku í verkefninu um framtíð brothættra byggða. Alls bárust umsóknir frá níu sveitarfélögum fyrir tólf svæði. Fyrir eru í verkefninu byggðarlögin Raufarhöfn, Breiðdalshreppur, Skaftárhreppur og Bíldudalur.

Sé horft á stöðuna eftir landshlutum er þátttaka og umsóknir eftirfarandi:

• Vesturland: Dalabyggð.
• Vestfirðir: Bíldudalur (með frá 2013), Árneshreppur,  Flateyri, Þingeyri, Suðureyri, og Strandabyggð.
• Norðurland vestra: Hofsós.
• Norðurland eystra: Raufarhöfn (með frá 2012), Grímsey, HríseyogKópasker.
• Austurland: Breiðdalshreppur (með frá 2013), Djúpavogshreppur  og Stöðvarfjörður.  
• Suðurland: Skaftárhreppur (með frá 2013).

Afgreiðsla umsókna hefur tekið lengri tíma en æskilegt hefði verið og skýrist það einkum af endurskoðun á verklagi og úttekt á verkefninu í heild, enda um þróunarverkefni að ræða. Niðurstaða þeirrar vinnu er að óráðlegt sé að dreifa fjármunum til verkefnisins og kröftum þeirra sem að verkefninu koma of víða ef árangur á að nást.  Réttara sé að hafa verkefnin ekki of mörg þannig að slagkraftur verði sem mestur í hverju byggðarlagi og því var niðurstaðan sú að ganga til samstarfs í þremur byggðarlögum að sinni.  Áður nefnd byggðarlög voru valin á grundvelli þess að staða þeirra þykir hvað veikust af umsóknarbyggðarlögum ef tekið er mið af lýðfræðilegum þáttum, atvinnusóknarsvæðum og stöðu í atvinnulífi meðal annars.

Þar sem verkefnið getur staðið nokkur ár í hverju tilviki er ólíklegt að unnt verði að ganga til samstarfs í fleiri byggðarlögum á árunum 2015-2016 en á árinu 2016 verður framhaldið metið út frá m.a. árangri verkefna og þeim fjármunum sem til verkefnisins eru ætlaðir á fjárlögum.