Fréttir

Á næstu sex árum mun Norðurslóðaáætlunin (Northern Periphery and Arctic Programme, NPA) veita um 56 milljónir € til samstarfsverkefna um 8,6 milljörðum íslenskra króna.  Þátttaka íslenskra aðila er styrkt með fjármunum úr Byggðáætlun fyrir árin 2014-2017 og áætlað er að veita um 1,8 milljónir € eða um 279 milljónum króna til að styrkja íslenska verkefnaþátttöku.

Þátttökulönd og starfsvæði áætlunarinnar má sjá á kortinu hér til hliðar, en auk þess hafa aðilar frá norðvesturhluta Rússlands og Kanada þátttökurétt.

Ýmsir aðilar geta tekið þátt í NPP verkefnum svo sem sveitarfélög, félagasamtök, ríkisstofnanir, atvinnuþróunarfélög, fyrirtæki, háskólar og rannsóknarstofnanir. Þátttaka í einstökum verkefnum getur verið blönduð milli þessara aðila og sérstök áhersla er lögð á samstarf atvinnulífs, háskóla, rannsóknarstofnana og svæða. Í hverju verkefni þurfa að vera samstarfsaðilar frá a.m.k. þremur löndum, þar af verður eitt þeirra að vera aðildarríki Evrópusambandsins.

Meginmarkmið Norðurslóðaáætlunarinnar er að stuðla að bættu atvinnu- og efnahagslífi með því að efla skapandi hæfni og getu til að framkvæma nýjar hugmyndir og lausnir þannig að búsetuskilyrði verði fyrsta flokks; að á norðurslóðum verði gott að;  búa, starfa, sækja sér menntun, heimsækja og þar séu áhugaverðir fjárfestingakostir.

Áherslur Norðurslóðaáætlunarinnar eru fjórar og innan þeirra eru sex forgangsverkefni.

1. Nýsköpun sem tæki til að halda upp og þróa öflug og samkeppnishæf samfélög.
    - Aukin nýsköpun og flutningur nýrrar tækni til lítilla og meðalstórra fyrirtækja.
    - Aukin nýsköpun í opinberri þjónustu á strjálbýlum svæðum.
2. Að hvetja til frumkvöðlastarfs sem ætlað er að nýta þá möguleika sem felast í samkeppnisforskoti norðurslóðasvæðisins.
    - Aukinn fjöldi og betra árangurshlutfall sprotafyrirtækja á strjálbýlum svæðum.
    - Að lítil og meðalstór fyrirtæki á strjálbýlum svæðum nái betur inn á markaði utan heimamarkaðar.
3. Að hlúa að orkuöryggi samfélaga með því að hvetja til orkusparnaðar og notkunar endurnýjanlegrar orku.
    - Aukin notkun orkusparandi úrræða og endurnýjanlegrar orku við húshitun.
4. Að vernda og nýta menningarlega og náttúrulega arfleið og koma henni á framfæri.
    - Auka getu strjálbýlla svæða til að takast á við meiriháttar félagslegar, efnahagslegar og umhverfislegar breytingar.