Fréttir

Klippt á borða við opnun Norðurstrandarleiðar

Föstudaginn 8. júní var formleg opnun Norðurstrandarleiðar sem Markaðsskrifstofa Norðurlands hefur undanfarin ár undirbúið í samstarfi við aðila í hverju héraði leiðarinnar, sem skilgreind er sem vegurinn sem næst strandlengjunni frá Hvammstanga í vestri að Bakkafirði í austri. Leiðin hefur þegar fengið verulega kynningu, sjá m.a. North Iceland og Arctic Coastway.

Næðingur var við Bakkafjörð þegar klippt var á borða við opnun leiðarinnar en heimamenn og gestir létu það ekki á sig fá. Fram kom að vonir standa til að leiðin geti orðið íbúum Bakkafjarðar og nærsveita lyftistöng varðandi fjölgun gesta á svæðinu og í því samhengi má einnig nefna áformaðar vegabætur á Langanesströnd.

Á þessu ári hefur verið unnið að því að gera upp verslunarhúsið á Bakkafirði og þar er áætla að koma upp lágmarks viðbúnaði í verslun, auk veitingaaðstöðu. Gestum við opnunina var boðið að skoða húsið og í framhaldi af því var gengið að skemmtilega skreyttum garði þar, Kristinn V. Jónsson og kona hans Gosia hafa unnið að handverki. Í skólahúsinu var Sveinn Haraldsson með mjög fróðlega umfjöllun um þekktustu skáld héraðsins, Örn Arnarson (Magnús Stefánsson) og Kristján frá Djúpalæk og las upp úr ljóðum þeirra. Gestum var að lokum boðið til máltíðar í skólahúsinu en þar hefur verið unnið ötullega að því að koma upp aðstöðu fyrir rekstur gisti og veitingaþjónustu í samstarfi Þorkels Gíslasonar og Langanesbyggðar. Þær ánægjulegu fréttir höfðu borist fyrir opnunardagskrána að ráðherra samgöngu og sveitarstjórnarmála samþykkti daginn áður erindi frá verkefnisaðilum og verkefnisstjórn Betri Bakkafjarðar (Brothættra byggða) um fjárstuðning til uppbyggingar í verslunarhúsinu og undirbúnings ofangreindrar gistiþjónustu.

Gestum boðið að skoða rými í verslunarhúsinu sem mun hýsa verslun og veitingaaðstöðu.

Myndir tók Kristján Þ. Halldórsson