Fréttir

NORA veitir 34 milljónir króna í styrki til nýrra samstarfsverkefna á Norður- Atlantssvæðinu

Norræna Atlantsnefndin, NORA, veitti verkefnastyrki að upphæð um 34 milljónir íslenskra króna í desember síðastliðnum, sem var síðari styrkjaúthlutun árið 2007. Styrkt eru 12 verkefni á sviði auðlinda sjávar, upplýsingatækni og svæðasamvinnu. Ekkert ferðaþjónustuverkefni hlaut styrk að þessu sinni.

Þátttakendur í verkefnunum eru frá tíu löndum, þótt meirihluti þeirra sé frá NORA-löndunum fjórum, Íslandi, Grænlandi, Færeyjum og Noregi.  

Þátttaka Íslendinga í NORA-verkefnum hefur jafnan verið góð. Að þessu sinni eru Íslendingar þátttakendur í 9 verkefnum af 12. Tvö af þessum níu verkefnum eru á sviði auðlinda sjávar, tvö í upplýsingatækni, tvö á sviði samgangna og þrjú á sviði svæðasamvinnu.

Með styrkveitingunum vill NORA leggja sitt af mörkum til þróunar samstarfs í atvinnulífi á Norður-Atlantssvæðinu. Það er gert með því að styrkja þróunarverkefni, efla samstarf og þekkingaryfirfærslu innan ferðaþjónustu, auðlinda sjávar, samgangna, þróunar atvinnulífs og samfélags. Áhersla er lögð á nýsköpun, sjálfbærni og umhverfismál.

 Frekari upplýsingar fást hjá  Sigríði K. Þorgrímsdóttur, Byggðastofnun, s. 455 5400,

 netfang:  sigga@byggdastofnun.is

Ný verkefni með íslenskri þátttöku:

• Fjallableikja, Akvaplan-Niva, Hólaskóli o.fl.
• Upplýsingatækni og fatlaðir, Félagsmálaráðuneytið
• Hreint haf, Umhverfisstofnun
• Samstarf lítilla alþjóðaflugvalla, Keflavíkurflugvöllur
• Northport, Eimskip ehf.
• Heimildaþáttagerð fyrir útvarp, Kvikmyndaskóli Íslands, RÚV
• Strandsamfélög og kynferði, Háskóli Íslands
• Nýsköpunarsamstarfsnet á vestnorræna svæðinu, Frumkvöðlasetur Austurlands 

Framhaldsstyrkur, verkefni með íslenskri þátttöku:

• Beitukóngur, Vör, Sjávarrannsóknarsetur við Breiðafjörð, Sægarpur o.fl.