Fréttir

Merki NORA

Norræna Atlantssamstarfið (NORA) vill efla samstarf á Norður-Atlantssvæðinu.

Ein leiðanna að þessu markmiði er veiting styrkja tvisvar á ári til samstarfsverkefna með þátttöku að lágmarki tveggja af fjórum aðildarlöndum NORA (Grænlandi, Íslandi, Færeyjum og sjávarbyggðum Noregs).

NORA óskar því eftir verkefnahugmyndum og styrkumsóknum með umsóknarfrest þann 4. mars 2013.

Í starfsáætlun NORA, sem má sjá á síðunni www.nora.fo, er bent á þrjú af meginviðfangsefnum svæðisins og hvar áherslur liggja varðandi verkefnastuðning á tímabilinu 2012-2016:

– Að styrkja sterku hliðarnar enn frekar með stuðningi við sjálfbæra þróun efnahagslega mikilvægustu atvinnugreina svæðisins. Það verður gert með því að styrkja nýsköpunarverkefni á sviði sjávarútvegs og auðlinda hafsins. Það geta til að mynda verið verkefni sem snerta aukaafurðir og vannýttar auðlindir.

– Að skapa ný tækifæri og efla fjölbreytni svæðisbundinna hagkerfa með því að styðja þróun nýrra atvinnutækifæra, framleiðslu, framleiðsluaðferða og markaðssetningar, t.d. verkefni í ferðaþjónustu, landbúnaði eða verkefni sem varða endurnýjanlegra orkugjafa. 

– Að sigrast á fjarlægðum, sem er eitt stærsta viðfangsefni á NORAsvæðinu og því verður mætt með því að styrkja verkefni á sviði fjarskipta, samgangna og flutninga og athafnamiðaðra greininga. Verkefnin geta t.d. varðað þróun upplýsingatækni sem henta sérstökum aðstæðum á Norður-Atlantssvæðinu eða eru til þess fallin að fjölga störfum í fámennum byggðarlögum
eða á jaðarsvæðum.

NORA styrkir gjarnan verkefni sem eru með svipaðar áherslur og fram komu á svæðaráðstefnu NORA 2012.  Ráðstefnan var undir yfirskriftinni „Nordic Welfare – The North Atlanctic Way“ og kastljósinu var beint að opinberri þjónustu á dreifbýlum svæðum.

NORA veitir styrki að hámarki 500.000 danskar krónur á ári og mest til þriggja ára. Skilyrði er að þátttaka sé frá a.m.k. tveimur NORA-löndum.

Á heimasíðu NORA er að finna leiðbeiningar um umsóknarferilinn undir valtakkanum „Guide til projektstøtte“. Þá er umsækjendum velkomið að leita til skrifstofu NORA um nánari upplýsingar og ráðgjöf.

Tengiliður á Íslandi er: Sigríður K. Þorgrímsdóttir Byggðastofnun S. 455 5400 sigga@byggdastofnun.is   

Umsóknareyðublaðið er að finna á heimasíðu NORA og senda á umsóknina rafrænt (á word-formi) til NORA og sömuleiðis útprentaða og undirritaða umsókn með pósti. Fylgigögn, eins og verklýsing og annað ítarefni, sendist rafrænt (á word, excel eða pdf-formi).

Sjá auglýsingu.