Fréttir

Í samstarfi við Jafnréttisstofu var haldið námskeið fyrir starfsmenn Byggðastofunar um samþættingu kynjasjónarmiða í alla stefnumótun og áætlanagerð. Meginmarkmið nýrra laga um jafna stöðu og jafnan rétt kvenna og karla er að konur og karlar hafi sömu stöðu og sömu réttindi á öllum sviðum samfélagsins.

Allir einstaklingar skulu hafa jafna möguleika til að nýta krafta sína og þroska hæfileika sína án tillitis til kyns. Til að ná þessum markmiðum laganna er m.a. lögð áhersla á að jafnréttissjónarmið verði höfð að leiðarljósi og að þau verði fléttuð inn í alla stefnumótun og ákvarðanir á öllum sviðum þjóðfélagsins.

Samþætting er aðferð til þess að ná kynjajafnrétti og felst m.a. í að gera kyn að grundvallarforsendu í stefnumótun og ákvarðanatöku, að flétta kynjasjónarhornið inn í alla stefnumótun, að endurskilgreina hefðbundið hlutverk kynjanna og að ná fram jafnrétti á sem flestum sviðum á sama tíma.

Á námskeiðinu var farið yfir hverning starfsemi Byggðastofnunar væri út frá kynjasjónarmiði, hver væri staða kynjanna í málaflokkum þeim er Byggðastofnun vinnur að, hverning við gætum gert breytingar og viðhaldið þeim. Forsendur árangursríkrar samþættingar eru góðar upplýsingar og yfirlit yfir stöðu , skýr markmiðssetning, árbyrgð á framkvæmd, tímarammi, endurskoðun og fræðsla.

Námskeiðið var sambland af fyrirlestrum og stuttum áhugaverðum verkefnum og þótti takast prýðilega