Fréttir

Stjórn Byggðastofnunar samþykkti á fundi sínum 28. maí 1999 með vísan til erindis menntamálaráðherra að gera með skipulögðu starfi á landsbyggðinni list og menningu að einum af grundvallarþáttum í byggðamálum. Þessi starfsemi nái bæði til atvinnu og áhugastarfa og taki mið af ályktun Alþingis um byggðamál sem samþykkt var á síðasta þingi.

Í samþykktinni fólst að ráðinn skyldi sérstakur starfsmaður lista og menningar er heyrði undir þróunarsvið Byggðastofnunar. Leitað yrði eftir við þau atvinnuþróunarfélög, sem væru með samning við Byggðastofnun um atvinnu- og byggðamál, að þau gerðust aðilar að þessari starfsemi með því að gera list og menningu að föstum lið í starfsemi sinni. Þau félög sem ákvæðu að sinna þessari starfsemi á þessu ári fengju framlag frá Byggðastofnun er nemi 1 milljón króna. Fullt samráð skyldi hafa við menntamálaráðuneytið um framgang þessara mála.

Menningarráðgjafi tók til starfa 1.ágúst 1999 og var starfssvið hans skilgreint sem hér greinir:

Að taka saman og miðla upplýsingum um stöðu menningarmála á landsbyggðinni.

1. Stefnu, fjármögnun og rekstur menningarstofnana ríkis og sveitarfélaga á landsbyggðinni.
2. Stefnu, rekstur og verkefni menningarstofnana með hlutverk á landsvísu.
3. Stefnu og rekstur einkaaðila í menningarmálum á landsbyggðinni.
4. Stefnu, fjármögnun og verkefni áhugamanna í menningarmálum á landsbyggðinni.

Að veita ráðgjöf þeim aðilum sem sinna menningarmálum á landsbyggðinni.

1. Ráðgjöf og aðstoð við stefnumótun sveitarfélaga s.s. varðandi listmenntun, safnastarf, varðveislu menningarminja.
2. Ráðgjöf við atvinnuþróunarfélög um menningarstarfssemi.
3. Ráðgjöf og aðstoð við menningarstofnanir og aðra aðila sem hyggja á verkefni á sviði menningarmála á landsbyggðinni.

Að efla samstarf og tengsl þeirra er starfa að menningarmálum á landsbyggðinni.

1. Að koma á samstarfsneti Byggðastofnunar, atvinnuþróunarfélaga, sveitarfélaga og annarra aðila er bera ábyrgð á menningarmálum á landsbyggðinni.
2. Að auka samstarf skólastofnana á menningarsviði við aðila á landsbyggðinni.

Að stunda rannsóknir á sviði menningarmála á landsbyggðinni

1. Að hafa frumkvæði að og efla samstarf um rannsóknir á sviði menningarmála á landsbyggðinni.
2. Að veita ráðgjöf og aðstoð vegna rannsókna á menningarmálum á landsbyggðinni.
3. Að stunda eigin rannsóknir á menningarmálum landsbyggðarinnar.