Fréttir

Við undirritun samstarfssamnings

Byggðastofnun, í samstarfi við Nýsköpunarmiðstöð Íslands, hefur hleypt af stokkunum nýjum lánaflokki.  Nýsköpunarlán munu skapa grundvöll til aukinnar nýsköpunar og þar með aukinna atvinnutækifæra í landsbyggðunum. Aðgengi að fjármagni til nýsköpunar utan höfuðborgarsvæðisins hefur verið takmarkað og frumkvöðlar talið lítinn stuðning þar að finna. Nýsköpunarlánum er ætlað að bæta úr þessu með bættu aðgengi að lánsfjármagni.

Nýsköpunarlán verða veitt til allt að fimm ára með sveigjanlegu endurgreiðsluflæði.  Hámarkslánveiting í hvert verkefni verður 5 m.kr. enda sé eiginfjárframlag að lágmarki jafnhátt.  Tryggingar verði í formi veðsetningu hugmyndar/vörumerkis/vöru/þjónustu en lánunum fylgir jafnframt breytiréttur í hlutafé.  Nýsköpunarmiðstöð Íslands mun greina lánsbeiðnir með tilliti til vægis nýsköpunar og skila umsögn til Byggðastofnunar til frekari úrvinnslu, ákvörðunar og afgreiðslu.

Myndin er tekin við undirritun samstarfssamnings. Frá vinstri: Arnar Már Elíasson forstöðumaður fyrirtækjasviðs Byggðastofnunar, Aðalsteinn Þorsteinsson forstjóri Byggðastofnunar, Þorsteinn Ingi Sigfússon forstjóri Nýsköpunarmiðstöðvar og Sigríður Ingvarsdóttir framkvæmdastjóri Nýsköpunarmiðstöðvar.

Leiðbeiningar og umsóknaform má nálgast HÉR.  Nánari upplýsingar veita Pétur Friðjónsson, lánasérfræðingur, peturf@byggdastofnun.is og Arnar Már Elíasson, forstöðumaður fyrirtækjasviðs, arnar@byggdastofnun.is.