Fréttir

Myndir tók Kristján Þ. Halldórsson

Uppfærð markmið og framtíðarsýn fyrir verkefni Brothættra byggða, Hrísey – perla Eyjafjarðar hefur nú litið dagsins ljós.

Á íbúafundi í Hrísey, sem haldinn var í janúar sl. fór Helga Íris Ingólfsdóttir yfir meginmarkmið verkefnisins sem skilgreind voru á upphafsmánuðum þess og lögð fram á íbúafundi í mars 2016. Markmiðin eru sett fram í þremur meginflokkum:

• Aðlaðandi og aðgengilegt eyjasamfélag
• Fjölbreytt atvinnulíf
• Sterkir innviðir

Á fundinum var unnið að endurskoðun markmiðanna og skoðað hvort bæta ætti við nýjum markmiðum eða aðgerðum. Meðal nýrra markmiða/aðgerða sem samþykkt var að bæta inn í verkefnið voru ljósleiðari til Hríseyjar, átak í markaðssetningu með fjölgun íbúa og atvinnutækifæra að leiðarljósi og að efla Hlein sem vinnuaðstöðu fyrir sjálfstætt starfandi fólk eða þá sem stunda fjarvinnu. Þá var mikið um það rætt á fundinum að tími væri kominn á orkuskipti í samgöngum til og frá Hrísey með því að fá nýja ferju sem gengi eingöngu fyrir rafmagni. Góð þátttaka var í vinnu við endurskoðun starfsmarkmiða verkefnisins sem fram fór í hópavinnu.

Verkefnisstjórn tók við þessum skilaboðum íbúafundarins og hefur nú unnið úr þeim undir forystu verkefnisstjóra og sett saman í nýtt markmiðaskjal sem finna má hér.