Fréttir

Í framhaldi af vinnu starfshóps heilbrigðisráðherra sem skilaði tillögum sínum til heilbrigðisráðherra sumarið 2023 um beitingu ívilnanaheimilda í lögum um Menntasjóð námsmanna, til að auðvelda mönnum heilbrigðisstofnana í landsbyggðunum, hefur háskóla- iðnaðar- og nýsköpunarráðuneytið nú fallist á skilgreiningu Byggðastofnunar á þeim svæðum sem til greina koma við beitingu þeirra við mönnum heilbrigðisstofnana.

Verkefnið er ein af aðgerðum gildandi byggðaáætlunar og snýr að því að bæta aðgengi að sérfræðiþjónustu á heilbrigðissviði óháð búsetu. Með samþykkt háskóla- iðnaðar- og nýsköpunarráðuneytisins á svæðaskilgreiningu Byggðastofnunar eru komnar forsendur fyrir því að sveitarfélög geti sótt um það til ráðuneytisins að ívilnanaheimildum verði beitt við mönnum heilbrigðisstofnana á sínu svæði. Mikilvægt er að þau vinni slíkar umsóknir eftir atvikum í samstarfi sín á milli og í góðu samstarfi við viðkomandi stofnanir.

Ferli mála er þannig að þegar umsókn hefur borist háskóla- iðnaðar- og nýsköpunarráðuneytinu ber Byggðastofnun í samstarfi við Samband íslenskra sveitarfélaga að vinna skýrslu um þörfina á að bregðast við þeim aðstæðum sem skilgreindar eru í viðkomandi umsókn. Sé niðurstaðan sú að þörfin sé til staðar getur ráðherra auglýst að ívilnun standi til boða en skilyrði er að lánþegi/starfsmaður hafi lokið viðkomandi námi, sé búsettur á skilgreindu svæði og nýti menntun sína þar að lágmarki í 50% starfi í a.m.k. tvö ár.

Svæðaskilgreining Byggðastofnunar vegna ívilnanaheimilda Menntasjóðs námsmanna.

Tillögur starfshóps heilbrigðisráðherra til jöfnunar á aðgengi að sérfræðiþjónustu á heilbrigðissviði óháð búsetu.