Fréttir

Starfsendurhæfing er mjög mikilvæg þjónusta fyrir fólk sem dettur út af vinnumarkaði vegna heilsubrests og er afgerandi fyrir möguleika þess á að komast aftur í vinnu. Í fámennum byggðarlögum þurfa starfsendurhæfingarstöðvar að geta boðið upp á þjónustu fyrir mjög margleitan hóp og uppfyllt þarfir fólks með ólíkan vanda. Í náttúrutengdri starfsendurhæfingu er lögð áherslu á að nýta stórbrotna náttúru í endurhæfingunni og dregnir fram styrkleikar þess að búa og starfa í dreifbýli og þeir nýttir í endurhæfingunni.

Harpa Lind Kristjánsdóttir vinnur nú að rannsókn á meistarastigi við Háskólann á Akureyri á kostum þess að innleiða náttúrutengda endurhæfingu í starfsendurhæfingu. Á fundi stjórnar Byggðastofnunar þann 16. febrúar síðast liðinn var ákveðið að styðja þetta verkefni um sem nemur 250.000,- Verkefnið hefur skýra vísun í meginmarkmið byggðaáætlunar. Áætlun verklok eru í mars 2019. Styrkurinn kemur af fjárveitingu byggðaáætlunar, en Byggðastofnun hefur frá árinu 2015 veitt styrki til meistaranema á háskólastigi sem vinna að lokaverkefnum á sviði byggðaþróunar í þeim tilgangi að auka vitund og áhuga háskólanema á byggðamálum og byggðaþróun og tengsl háskólasamfélagsins við byggðaáætlun hverju sinni.