Fréttir

Hvaða kraftar munu hafa áhrif á búsetuþróun á Íslandi fram til ársins 2030? Leiða þeir til vaxandi fólksflótta eða fjölgar landsmönnum svo um munar? Verður Ísland borgríki eða munu landsbyggðirnar ná jafnvægi? Hvert ber að stefna í byggðaáætlun sem er í mótun?

Fjallað verður um þessar spurningar og fleiri á ráðstefnu Byggðastofnunar og atvinnuvega- og nýsköpunarráðuneytisins á Grand Hótel í Reykjavík þriðjudaginn 27. september næstkomandi. Þar verða kynntar niðurstöður sviðsmyndagreininga á búsetuþróun á Íslandi fram til ársins 2030. Sviðsmyndagreiningarnar eru hluti af vinnu við gerð byggðaáætlunar 2017–2023 og hafa staðið frá því í vor á vegum Framtíðarseturs Íslands.

Eftir kynningu Karls Friðrikssonar og Sævars Kristinssonar hjá Framtíðarsetrinu á sviðsmyndunum tekur Þóroddur Bjarnason, prófessor við Háskólann á Akureyri, saman mikilvægustu niðurstöður og lýsir áhrifum sem þær kunna að hafa á þá byggðaáætlun sem nú er unnið að. Að því loknu ræða þátttakendur áhrif og viðbrögð í umræðuhópum með umræðustjórum. Umræðustjórarnir gera síðan grein fyrir niðurstöðum í ráðstefnulok.

Ráðstefnan stendur frá klukkan 13:00 til 17:00.

Nákvæma dagskrá má finna hér og hér er hægt að skrá sig á ráðstefnuna fram til 23. september.

Byggðaáætlun 2017–2023 er unnin samkvæmt lögum sem samþykkt voru á Alþingi árið 2015. Hún skal ná til landsins alls, líka höfuðborgarsvæðisins. Hún hefur sjö ára gildistíma í stað fjögurra og áhersla er lögð á samráð við þá sem hagsmuna eiga að gæta, sem og samþættingu við aðra opinbera áætlanagerð.