Fréttir

Heimskautagerðið á Raufarhöfn

Um síðastliðin mánaðamót hófst á ný vinna við  Heimskautsgerðið á Raufarhöfn eftir nokkurt hlé.  Í fyrstu er unnið að því að kljúfa bergið í námunni og móta steina í Austur- og Vesturhlið gerðisins og í framhaldi af því verður hafist handa við að reisa hliðin.  Einnig er í þessari lotu áætlað að móta steina og reisa hluta af skúlptúrum er standa  eiga innan gerðisins.  Vinnan við verkið í vetur er fjármögnuð með styrk sem Framkvæmdasjóður ferðamannastaða veitti til verksins í úthlutun á vordögum 2013 og skiptir sá styrkur sköpum varðandi framvindu  uppbyggingar gerðisins.  Enn  fremur má líta á aðkomu Framkvæmdasjóðs að gerðinu sem mikilvægt innlegg  í átaksverkefni í byggðamálum á Raufarhöfn, verkefni sem jafnframt er hluti af „Brothættum byggðum“, þ.e.  samstarfsverkefni Byggðastofnunar, Háskólans á Akureyri,  sveitarfélaga, atvinnuþróunarfélaga og íbúa á hverju þátttökubyggðarlagi.  Heimamenn vinna jafnframt að því að móta sýn á Raufarhöfn sem áfangastað ferðamanna allt árið.

Heimskautsgerðið er talið munu hafa mikið aðdráttarafl á ferðamenn þegar fram í sækir og verður því afar mikilvægt fyrir Norðausturhorn landsins varðandi uppbyggingu ferðaþjónustu á svæðinu.  Það að byggja upp ferðaþjónustu á Norðausturhorninu er í senn mikilvægt fyrir búsetu á þessu landshorni og fyrir ferðaþjónustuna í heild varðandi það að dreifa álagi af ferðamönnum um landið til að hlífa  m.a. náttúru og samfélagi á fjölsóttustu stöðunum.  Nú þegar er töluvert um að ferðamenn komi til að skoða og spyrjast fyrir um gerðið, jafnt erlendir sem innlendir gestir.